立場新聞 Stand News

【Art Central】用藝術慢煮一個杯麵

2019/3/26 — 21:32

你煮一個杯麵要幾耐?不會超過 3 分鐘吧!藝術家煮一個杯麵可久了,盛惠 2 小時,搞咩搞咁耐?

今年 Art Central 的白牆攤位入面,零零舍舍有個 tiffany blue 嘅空間,有砧板、電磁爐,仲有個雪櫃添。唔講唔知,以為係方太教你煮咩餸移師藝博會。掌廚的,唔係姓方,而係來自南韓的藝術家丘旼子(Minja GU)。

烹飪節目咁款

烹飪節目咁款

廣告

1977 年出生的丘旼子,喜歡透過創作思考日常消費主義與物件價值的關係。2014 年,她首次運用即食麵進行創作,並於印尼首次上演名為《The Authentic Quality》的藝術表演。生活在南韓的她每日接觸多種即食食品,吸引其注意力的不是方便快捷有飯開,而是圖片往往僅供參考,煮出嚟個樣總係同包裝說明嘅有(一大)段距離。因此,她嘗試模仿宣傳照,將即食食品重新炮製。製作過程一絲不苟,她甚至用尺度住每樣食材嘅大小,精心切割,耐心烹調。

廣告

單睇架生,唔講以為做手術

單睇架生,唔講以為做手術

鉗住八爪魚逐片烚

鉗住八爪魚逐片烚

就像今次來到香港,丘旼子選擇挑戰「合味道香辣海鮮杯麵」。她笑言,南韓料理俾人嘅印象都係紅色同辣口,但偏偏韓國當地係無「香辣海鮮」嘅口味,所以佢特別好奇香港有售嘅香辣口味到底係咩料子。Art Central 開幕當夜,她 5 點半準時開火,煮椰菜期間仲不時同圍觀嘅人傾偈,有講有笑,笑住話:「呢個杯麵我好可能煮足兩個鐘㗎!」

南韓藝術家丘旼子

南韓藝術家丘旼子

抽走原本配料,換成新鮮食材

抽走原本配料,換成新鮮食材

丘旼子首先將杯麵所有配料抽走,改用新鮮的辣椒、蔥、粟米、蛋、椰菜和八爪魚。配料的形狀並非隨意,而是經過藝術家連月來的研究。牆上貼著的繪圖都是她的「cup noodles study」結果,從杯麵的宣傳照中分析出每樣食材的數量和大小。佢認真到一個點,甚至將椰菜的形狀造成模具,跟住個模慢慢𠝹出嚟,咪話唔佩服!

照住個模切菜,到底係一絲不苟定 on9?

照住個模切菜,到底係一絲不苟定 on9?

仔細裝嵌

仔細裝嵌

佩服嘅,唔單只係佢呢份專業同專注,人來人往佢繼續細心地度尺切菜。你可能話,佢無唔無聊啲啊,一個杯麵煮兩個鐘,完全侮辱咗杯麵作為效率和進步嘅象徵。不過我又咁睇喎,正因為佢用慢抗衡咗快,將兩分鐘做完嘅嘢攤返開兩個鐘頭做,你先睇到機械幫忙縮減咗幾多時間,背後又有幾多人手工夫先成就到你兩分鐘開到飯嘅奇蹟。現代社會好多好方便嘅嘢都唔係必然,只係一切都太快,快到你根本睇唔到,或者唔會諗到。佢用超理性的方法,拆解重組唔起眼嘅杯麵,咩 size 都要度過算過,用人代入機械化生產,呈現工具理性荒謬的一面。

淥個杯麵都叫藝術?咁就要睇吓你個杯麵點整法喇!好似丘旼子咁分解再裝嵌,的確唔係「煮個麵你食咁簡單」。學著名 Lego 膠暨藝術家話齋,「on9的事認真做」,藝術可能就係咁簡單啊!

圖析杯麵

圖析杯麵

發表意見