立場新聞 Stand News

曹星如 — 一個終結,另一個開始

2018/12/3 — 23:51

圖片來源:曹星如 Facebook

圖片來源:曹星如 Facebook

「曹星如宣布,為代表香港出戰東京奧運 2020,決定由職業拳手轉為業餘拳手。」

問:史兄,拳擊又關你乜事,要勞煩你特登寫篇文講曹星如?

答:無錯!講真唔關我事。事實上我睇 MMA 同 K1 多過拳擊。

廣告

不過,網上世界,最緊要多管閒事、夠諸事八卦,最好唔夠料又要扮四條,或者言論尖酸刻薄啲,咁就會紅。我檢討過,原來咁耐以嚟,冇試過寫文恥笑任何名人。

寫名人有個好處:若果你係小人物(如本人),瘋狂批評一個名人後,(1) 你容易刷到啲存在感同虛榮心而 (2) 因為該名人唔知你寫緊佢所以無乜後果。成本低而回報高,尤其適合心靈空虛嘅人(如你我)。

廣告

問:咁曹星如有乜嘢值得好恥笑?

答:我唔識曹星如,但我幾肯定,曹星如係條 kai 子嚟。

記得某次比賽完畢 — 應該佢廿或廿一連勝嗰場,曹星如食咗對方好多拳,眼腫口腫面腫額頭腫、喘住氣咁接受一大抽記者訪問。

訪問內容詳情已經唔記得,只記得曹星如喺訪問開始無耐,諗起自己訓練有幾辛苦就喊咗出嚟……睇到人心都酸。

更重要係,訪問完結,曹星如拎起相機,主動同在場記者一齊 selfie,仲要影咗好幾張。

訪問可能係大會規定,但當打完一場比賽,又累又痛,訪問完結你留低同記者影大合照,咁就並不是交功課交差咁簡單:曹星如非常感謝記者嘅照顧,更當記者是朋友咧。

當記者係朋友!大佬呀!打完場比賽,食咗幾百拳,訪問完嗱嗱臨搭車返屋企瞓覺,仲主動你班友影相?我睬你都傻。

我有啲以偏蓋全:曹星如好天真、好純、好簡單、唔精於計算嘅人。佢覺得啱嘅嘢,就會去做。

問:曹星如係 kai 子、好簡單等戇鳩特徵,同佢去打奧運有乜關係?

答:絕對有。

曹星如一路走嚟係咁簡單、咁 kai 嘅人,我相信曹星如係因為想代表香港而去打奧運。

並非單純為自己,更重要嘅為香港。

留意,唔係話自己唔重要;而係職業拳手、拳王、連勝記錄、金腰帶,曹星如始終掛住個人名義參賽。惟有參加奧運,先係背住香港嘅名義出戰。

曹星如心裏面,「自己」同「香港」兩者間嘅輕重,得佢知(可能連佢自己都唔知),但我相信,曹星如無忘記香港 — 佢喺香港出世、長大、學壞、發圍、成為拳手、轉為職業、登上拳王之位。

✽ ✽ ✽

問:曹星如可能見自己開始走下坡,倒不如把心一橫,轉打業餘參加奧運,刷一下光環。動機無你講咁純真純情純品純潔純愛。

答:「信任」,其實同「鬼」(妖魔鬼怪嗰隻「鬼」,唔係選舉鎅票嗰啲「鬼」)、「美國曾派太空人登陸月球」、「一國兩制」一樣:你信就有,唔信就冇。

2018 年,香港可以「信」嘅嘢,實在太少:政府從未可靠、政客呃飯食呃足幾十年、媒體偏頗、法治江河日下、社會經濟民生交通規劃文化膳食居住無嘢靠得住,你老母連匯豐都無咗光環(仲記得「聖誕鐘,買匯豐」嘛?),最慘連劉華都誤上老董條賊船呀。而家只係等周潤發四年後宣布挺林鄭連任,到時香港先真正踏入最黑暗嘅一天。

香港人對自己身份嘅自豪感、認同及信任,廿年嚟不斷畀人矮化同蠶食,對前途嘅希望同憧憬,一早拎撚咗去堆填啦。

你自問,十秒內要你講出五個你相信嘅名人或五件你相信嘅事。

我唯一仲堅信嘅,只有政府高官全部仆街嚟。

曹星如呃我,有乜著數?冇,起碼我冇損失。我信佢,起碼買有個希望(仲要係免費)、信有條 kai 子肯為咗幫香港爭取一個奬牌,放棄咗好多自己肯定擁有嘅嘢 — 付出與成本係肯定,回報同奬勵卻充滿風險。

老實講(儘管本人一路非常老實,不過寫文或講嘢前加句「老實講」,跟住嗰幾句就忽然變得重要同認真,呢招萬試萬靈),呢幾年香港荒謬之事無日無之,沒有最仆街、只有更仆街,政治文化財金政府市容環境道德羞恥,徹底淪陷。

香港人唔係輸到怕、就係輸到接近麻木,對幾乎所有嘢冇哂感覺,「是但啦,做乜都冇用」。

即使曹星如今日宣布為代表香港參加奧運,放棄咗一大抽嘢(金腰帶、世界第一排名、廿二場連勝),依然會有大量人質疑佢「怕輸」、「割禾青」、「爭取光環」。

香港運動員嘅佳績,已係近年碩果僅存仲值得香港人驕傲嘅嘢嚟:曹星如係世界拳王、吳安儀贏咗三次世界桌球錦標賽冠軍,今年年頭成為世界排名第一、李慧詩贏過世界冠軍。

李麗珊講過:「香港運動員唔係垃圾。」

香港有好多好嘢好人好事,只係大家唔再記得點去欣賞。

圖片來源:曹星如 Facebook

圖片來源:曹星如 Facebook

問:如果你係曹星如,你會點?

答:我份人超懶,好怕做啲會出汗嘅嘢,例如打拳、舉重、跑步呀……即使每星期去做 gym,絕大部份時間留喺電視區睇戲,絕少出汗。我又怕痛怕傷,有時候剪指甲會怕畀指甲鉗整親。

所以,我係廢青版曹星如,in the first place 唔會去打拳。唔使養家嘅話,我選擇以打手遊為終身職業,唔係打電競嗰啲遊戲,而係玩啲「愛課就會贏」嘅鬥身家手機遊戲。唔好問我課金啲錢點嚟,太多問題我一時間處理唔到。

可惜,最終要養家,打機不切實際。只好搵返朝九晚六嘅工 — 即使你人工得三千蚊。

退多步,即使我成為拳王版曹星如,我亦絕對唔會諗參加奧運。仆你個街,轉打業餘,你養我呀?原本就係覺得打機不切實際,所以轉咗去打職業拳,夠在地,又有收入(出場費、贊助等);然後一個屈尾十我又要轉返去業餘,冇錢、放棄啲腰帶同稱號。咁點解我唔一早去打手遊?

我要碌多幾條光環、銀行結餘多幾個零,一定繼續做職業拳手。反正企喺 comfort zone,做返一路做嘅嘢,難度較低 — 唔係話做職業拳手好容易,只係改變太難。

我會打多三兩年職業後退休,中途接下戲嚟演、唱下歌、接幾個廣告代言,然後同大陸資金合作,再去大陸做拳擊表演賽,或者上武術節目做下小丑,好好利用知名度,搵定以後六十年要洗嘅錢。

呢條公式好熟?過去十年,呢個咪大中華娛樂圈人士嘅搵錢方程式。姓鄧嘅女歌星、姓陳嘅男政協、三姓動作演員(個仔吸毒嗰個),一模一樣、一式一款。

反而,去參加奧運,先唔好講好要花年幾打比賽,放棄以上嘅嘢,先有可能入到圍;即使入到決賽,以香港人「勝利球迷」嘅心態,拎唔到金牌都只會當係輸。更恐怖係,到 2018 年嘅今日,當局亦未安排奧運拳擊賽事嘅參賽安排同細節,有人話連有冇奧運拳擊都未知呀!

要繼續職業拳手,捨難取易,又有邊個夠資格怨我?

✽ ✽ ✽

問:曹星如幫咁多公司代言,而家佢由職業轉業餘,你會點玩呢條橋?

答:梗係搵佢代言嗰間保險公司出嚟,保證曹星如一世有年金(每月一百蚊都好),唔受佢職業、前途、年齡所影響。只要保險公司唔執,保證個個月有錢派!

另外,Nike 早幾月喺美國出咗個超勁嘅 campaign,其中一個代言人係前美式足球員 Colin Kaepernick,廣告口號係:

“Believe in something, even if it means sacrificing everything.”

2016 年 Kaepernick 為表示對美國境內種族不公,喺美式職業足球比賽開賽前嘅國歌演奏時單膝下跪,以示不滿。事件引起極多爭議,批評與支持之聲不絕。該球季完結後,無任何職業足球隊再聘用 Kaepernick。Nike 大膽起用 Kaepernick,仲用佢配呢句口號,意境簡直神來之筆。

我唔敢講曹星如比起 Kaepernick 係更偉大,還是更戇居,但如果我係 Nike 香港嘅高層,我會建議美國總公司亞洲區嘅廣告,用曹星如代言呢句口號:

一個廢青經過種種際遇,成為亞洲拳王,然後放棄職業拳手嘅資格、廿二場連勝紀錄、WBO 超蠅量級拳手世界第一嘅排名,目的只係想拎一個參賽資格,代表自己嘅家 — 香港 — 去參賽東京奧運 2020。

“Believe in something, even if it means sacrificing everything.”

信我,一定掂。(Ok,我知佢哋最終用咗 “It’s crazy until you do it”)

Colin Kaepernick

Colin Kaepernick

問:你講到曹星如幾乎要聽日起程去梵蒂岡封聖咁滯喎……

答:不不不。我只係相信曹星如。

呢邊廂所謂「香港人」喺度出賣、利用、搞散香港,貪圖私利同權力,我相信另一邊廂有真正嘅香港人付出時間名譽精力地位,努力為香港爭取殊榮。

當大部份中年人食完飯嘅話題離唔開移民,一心搵夠就離開,我相信依然有香港人視呢度為終身嘅家,勇於留喺度實現自己嘅理想。

當好多人不斷懷緬香港光輝嘅過去,或者狂碌昔日建立嘅光環,有人將目光放喺未來,勇往直前,爭取新嘅佳績。

就係咁簡單。

✽ ✽ ✽

問:從經濟學角度出發,曹星如作為拳王,去打奧運係咪贏硬金牌?

答:你問錯咗人,畢竟我唔係張五常,可以用經濟學解釋宇宙嘅一切事情……

不過,可以講下數據。根據維基百科

  • 1984 年至 2016 年嘅奧運蠅量級(Flyweight)比賽,十個金牌得主當中,有九個拎牌嗰陣喺 24 歲以下。
    第十個?2008 年金牌得主 Jongjohor,當年佢 33 歲。
  • 呢十屆奧運蠅量級奬牌 39 個得主(金、銀、雙銅),除咗 Jongjohor,只得一個人當時 30 歲以上,佢就係 2008 年 Jongjohor 嘅對手,Laffita,當時佢 30 歲。
  • 至於重些少嘅雛量級(Bantamweight),仲大鑊!過去十屆 40 個奬牌得主,攞奬嗰陣年紀最大嗰個得 29 歲 — 1996 年銀牌得主 Arnaldo Mesa。

曹星如呢?今年 31 歲,2020 年東奧時 33 歲……歷史統計嚟講,曹星如要拎奬牌,機會唔係冇,不過低啲囉。

又,曼城 2011-12 年英超最後一場比賽,86 分鐘仲輸緊 1:2,96 分鐘反勝 3:2 兼捧冠;喺 2015 年之前,又有邊個估到金州勇士作為一隊跳投球隊(jump shooting team),可以拎到 NBA 總冠軍,仲要四年拎三屆?又有邊個估到 2016 年騎士落後 3:1,最後會反勝場數 4:3?

運動之所以有趣、咁引人入勝,正正由於有意外驚喜,唔係乜嘢都預計到,啱唔啱?

問:又,點解要用問答方式寫呢篇文?

答:祖師爺林振強教落,唔想諗篇文嘅結構,用問答形式就解決了。明未?

 

作者 Medium

發表意見