立場新聞 Stand News

摩迪一個同你搞掂哂

2018/7/9 — 13:55

摩迪(圖片來源:FIFA World Cup Facebook)

摩迪(圖片來源:FIFA World Cup Facebook)

到底摩迪係咪癡線?

全場踢足 120 分鐘,佢就跑足 120 分鐘;跑上又跑落,自己禁區見到佢,人哋禁區都見到佢;又攻又守又搶又迫,加時下半場都仲可以繼續前場迫,有一下喺俄仔禁區迫到俄仔甩波,眼看球波應該會飛出角球邊線,點知佢開行加速器,竟然最後喺出界前追得返。

攰,我諗佢其實都攰,大佬,踢足 120 分鐘,鐵人都死,仲要佢唔係 18、22,係已經 32!但就係嗰下要贏嘅意志力,令佢去到加時都繼續同你爆幾段。

廣告

全場 139 次觸球、102 次傳送、87% 傳球成功率、10 次長傳、14 次搶波成功、4 次製造機會、1 個助攻、跑動範圍全場,佢唔止係同你跑咁簡單,係長傳、短傳、較炮、控制節奏乜都有。

一個人有技術、有視野、能攻既守、勤力到唔係佢範圍之內嘅職責佢都同你做埋,如果一間公司見佢勤力就乜都畀哂佢做就真係做死佢,但為咗國家隊佢義不容辭,出哂全力同你搞掂佢。

廣告

十六強鬥丹麥後,拉傑迪透露:「摩迪已經喺球場上救咗我哋好多次,我哋係時候報答返佢。」

足球,唔可以靠一人之力,克羅地亞都唔止靠摩迪一個,但一個有魅力嘅球員,係可以用自己嘅能力去感染全隊波為你而戰,而我相信摩迪就係呢種人。

 

標題為編輯所擬,原刊於作者 Facebook

發表意見