立場新聞 Stand News

冰島絕對值得有呢一分

2018/6/17 — 11:07

ViuTV 截圖

ViuTV 截圖

12碼唔入,可以係射得差,但另一方面都可以係龍門救得靚。

成功救出美斯十二碼嘅冰島門將,佢個名叫荷杜臣。佢本身只係一位業餘球員,真正身份係一名導演。兩年前歐國盃嗰陣,佢暫且放低正職導演身份,全職投入足球事業。今年34歲嘅佢,喺世界盃之後就會退役,然後回歸電影圈。

不過,只係讚荷杜臣一個根本唔公平,因為冰島呢個歷史性一分,係全隊人一齊贏番嚟。

廣告

佢哋全場被阿根廷撳住嚟打,擺明係處於下風,但佢哋選擇用最簡單直接方式踢出最有效嘅足球-毫無多餘嘅盤扭、你走位我畀波、全場超有紀律性嘅防守、每個球員都毫不錫身地使出「熱誠飛剷」;

即使一個失位,其他人都不惜氣力去補位,齊上齊落,你去搶,我去包,嗰種連牽性為冰島織成一個密不透風嘅保護網,就算整體技術唔夠阿根廷勁,都可以用團結嘅鬥志嚟補救,呢一點就係同技術高一班但毫無整體性嘅阿根廷嘅最大分野,而呢份熱血絕對渲染到好多本身對冰島毫無感覺嘅球迷。

廣告

佢哋唔止係維京式慶祝令人熱血,佢哋喺場上嘅表現都係咁熱血,直情係畀埋條命出嚟,呢啲生命足球,叫人點可以唔欣賞同畀掌聲?

呢一分得來不易,但冰島絕對值得有呢一分!

題為編輯所擬,原刊於作者 facebook

發表意見