立場新聞 Stand News

點解無人講下海外醫生諗緊乜嘢?

2019/5/17 — 21:59

資料圖片,來源:Unsplash

資料圖片,來源:Unsplash

最近幾個不同的方案搞到醫委會和香港醫學界滿成風雨,文科生只想就著方案講兩句。

以我的理解,所有方案仍然要求海外醫生無論如何都需要去考執業試,只免除已做了三年公立醫院 +/- 衛生署 +/- 大學醫學院的醫生考試後強制的實習。

在討論這些方案之前,我們要先了解一下其他發達國家的做法是怎樣:

廣告

新加坡

新加坡醫委會有張清單,裡面列名了合資格的醫學院。呢張清單可加可減,最近減到得 100 間醫學院合資格。在合資格的醫學院畢業的醫生便可以申請在新加坡工作,在實習其間由顧問醫生評估,一年後如果表現理想便合資格申請正式執照。

澳洲

海外畢業的醫生可以申請報考 AMC,合格後便可申請正式執照。但如果是世界知名的醫生或已有專科資格的醫生,而其專科資格是受認證的話是可直接申請評核而不用考試。如獲承認的話可直接註冊專科醫生執照。

* 好多人誤會海外醫生要在澳洲山區做 10 年,這是錯誤的。海外醫生如果想出 private 又想要 Medicare rebate 的話才有那 10 年的 memorandum,而在個別情況下那 10 年限制會有所改變。

至於英國和美國,文科生不太熟悉,讀者朋友可以幫幫手 supplement。

好啦,了解完新加坡同澳洲後,香港到底點解一點吸引力都無?大家可以想像兩種最常見的情況:

廣告

1. 初級醫生/剛畢業生
2. 資深/專科醫生

初級醫生/剛畢業生,如果申請有限度註冊的話,在等考試的那兩三年內的訓練算不算數?入唔入得 college 做 basic training?可唔可以考 college basic training 試?好啦,終於花一年考完個試,要做半年 extern,嗰半年又當不當 training?我又要不要得多半年先可以 advance/higher training?

另一個情境,我喺英聯邦國家畢業,決定喺英聯邦國家做住醫生去考個執業試。個要求係要有 full license,即係我要喺英國做了一年實習醫生攞了 full license 再考 paper 1, 2 & 3。而考這些 paper 就算最順利都要一年。即是話我已經喺英國是 postgraduate year 3 才可以來香港,還要再重新 extern,那麼在英國的 basic physician training 你又計不計數?不計數的話我又要重新開始 train 過?

我想講目前的方案對初級醫生吸引力極有限。更加重要的是,其他國家的海外醫生會有班顧問醫生看著,人家是玩 team based,即是話巡房係 3-4 人行,有個 advance trainee,有個 basic trainee,有個 resident MO 去看實一個實習醫生。Team based 形式的系統可以確保醫生的質素和病人的安全,每條 team 大約睇 10-20 個住院病人。但香港呢?一個普通內科 MO 講緊「自己」一個醫生要巡二十個症以上,有無咁多資深醫生去看實海外的初級醫生?到最後還不是任由佢哋自生自滅。

另外,香港公立個系統出名係咩?係出咗事後光速割席,即刻深感抱歉再深切檢討,醫委會仲會無視人手不足同環境因素之後判你職業失德除你牌。有邊個敢講話自己做 junior 的時候無瀨過屎?有邊個成長時唔洗人執屎?但個環境允唔允許有人幫手執屎,同執屎的後果係乜嘢,又唔知點解無人諗過?

成個環境係咁樣的時候,到底可以吸引到海外邊啲知名醫學院的人才?

✽ㅤ✽ㅤ✽

講完初級醫生,講下顧問醫生。

世界各地已發達的國家,英美加澳無一個國家的顧問醫生係搵唔到食。攞哂專科牌後點解要返香港呢個地獄般的工作環境,仲要考個執業試再做半年 extern?

好啦,當你個新 policy 免實習,考完執業試後你公立醫院有無咁多顧問醫生的位置安排?定係諗住是但搵個 resident specialist 的位叫人得閒都仲要 on call,一朝巡 20-30 個症,下午再睇 30 個clinic?如果你淨係俾個 resident specialist 人哋,人哋做完你 3 年 exempt 咗 extern,點解仲要留喺公立?

你成個 package 都吸引唔到人回港係公立醫院行醫,吸引到都充其量係做三年之後自己開檔做 private,係到底舒緩到幾多香港醫療系統爆煲的問題?

✽ㅤ✽ㅤ✽

其實你只要企喺海外醫生的角度去諗就會明白,成件事無論邊一個方案都係唔吸引。

喺外國做得舒舒服服點解要返香港?貪你金鐘站要等 8 班地鐵先返到屋企、俾咗成 1,000 萬先買得起的 800 呎私樓連車位、日日有開工無放工、放工去商場只會驚見隨地便溺的大媽?

到最後有邊啲人會返來香港?

1. 為錢
2. 真係好愛好愛好愛香港的醫生

但你要明白,即使香港醫生薪金高都好,係用生命換返來,到底有幾多海外醫生愛香港愛到會犧牲生活質素去回港?

 

作者 Facebook

發表意見