立場新聞 Stand News

香港教育整風運動

2018/5/7 — 6:50

有關香港教育政策的爆鑊新聞一單接一單,市民心諗,你班衰人俾我抖下得唔得?

先有中史科教科書,啲出版社年年都係咁寫,年年都係咁送審,唯獨是今年好多個地方被評為有問題,例如「中國收回香港」、「香港在中國的南方」、「一黨專政」等等。呢啲教科書唔係今年先至咁寫,但你今年先至話唔啱,即係個標準轉咗喇。

最無厘頭係「中國收回香港」,鄧小平一直都係咁講,香港政府網頁又係咁寫,點解無啦啦要改?咁梗係唔係班評審委員或者教育官僚自己無啦啦想改,而係西環話要改。鄧小平?佢算老幾?習帝出晒名係唔buy鄧小平,所以咪可以當鄧小平都錯囉。

廣告

點解要改?你見西環換晒人就知。新嘅中聯辦主任王志民行動高調,直情一個直轄市黨委書記一樣。佢最多人記得嗰兩樣嘢,一個係要同林鄭「行埋」,一個係要「信念過硬、政治過硬、責任過硬、能力過硬、作風過硬」。而家佢咪就係政治過硬、作風過硬囉。

你睇楊潤雄呢個國際學校家長,去到立法會答問題,佢答到1999,根本就係俾西環定咗條極左line to take,所以即使係幾荒謬幾醜怪佢都要照講。你睇佢死撐嗰個樣,真係幾似看門狗。不過呢條友絕對唔抵可憐,你做官一個面收幾十萬一個月,一面毒害香港學生,自己仔女就讀國際學校。

廣告

教科書拎去送審,係要睇內容有冇偏頗失實。中國收回香港,呢樣嘢鄧小平咁講過、外交部咁講過、特區政府都咁講過,而家突然要改,你好難說服香港人呢個係學術上嘅修改。有眼都見到呢個係中共慣晒嘅做法--要史觀遷就黨嘅意識形態。

中史教科書新聞仲燒緊,就搞到通識科。政府想郁通識科都唔係咩新聞,不過而家個通識科檢討都未有結果,就吹風話可能由分1至5**改做只分合格不合格,甚至可能建議由必修改做選修。呢個時候,啲帝制派就撲晒出嚟造勢。最搞笑係教聯會個黃均瑜,佢話佢個年代冇通識,啲學生鵪鶉啲,唔敢挑戰權威。嘩!你都算無賴喇,你點記得你地土共六七年啲學生點樣暴動放炸彈架?

通識科點樣出嚟?係因為啲僱主話香港學生唔夠視野。而家要搞通識科,係咪即係唔駛學生有視野?講到尾,就係中共最唔鍾意嘅嘢,就係啲學生有獨立思考、會關心社會。而家要收網、要清算、要整風,當然要制止學生獨立思考、關心社會。正常人一思考、一會關心,就會發現你中共幾邪惡。

一不離二,二不離三。教育局請大陸學者做顧問,教育局網站一篇早幾年嘅文俾人搵番出嚟,篇文話「香港人母語唔係粵語」,因為漢族嘅母語係普通話。政府要推普廢粵,都唔係咩新聞。香港多數人母語唔係粵語而係普通話,呢樣嘢根本係違反常識。你可以話普通話係中國嘅國民共通語言,但唔可以話香港多數人係漢族所以母語係普通話。

推普廢粵一直係中共國策,佢地之前一直搞廣東人,搞埋香港可以預期。矮化香港人母語,喺中小學推動普教中甚至普教全部科,呢個係消滅香港文化嘅長遠政策。

呢篇文唔係新嘢,但林鄭去到立法會,有議員問佢母語係乜,佢就真係「作風過硬」呀,佢唔係正面回答,而且話個問題無聊唔答。佢去立法會係答議員問題,而且咁係咩態度?

林鄭嘅態度同嘴臉,更加印證一樣嘢,就係特區政府而家已經係被西環直接指揮,一旦俾西環落政治柯打就冇彎轉,寧左勿右,連講句人話都唔敢。

大家都見到,特區政府「搞」教育係其中一個重要政治任務。而家好明顯係西環指揮梗特區政府,要好似延安整風咁搞香港教育整風。延安整風要統一思想,逐隻字搞文字獄、禁止獨立思考。港共要教育內容跟住中共意識形態嚟修改,而且係逐隻字咁執,其實即係整風。中共要搞整風,一定係雷厲風行,遇神殺神。尤其是習近平當政,佢上台之後,全國就係不斷整風,大搞意識形態左轉,喺香港,之前已經搞緊全面控制大學、迫走異見學者教授、批鬥中小學教師、借反港獨之名迫大學聯署歸邊,跟住就搞通識、搞教科書、搞母語,整風嘅動作唔會有停嘅一日。

我係唔係捕風捉影、杞人憂天?我只可以咁講,喺中共政治鬥爭歷史裡面,從來啲人擔心嘅嘢最終都會發生,而且只會比大家擔心嘅更邪惡。

呢個時候,教育界一定要出聲,令特區政府唔可以予取予求。聽講林鄭會去破天荒出席教協會慶,佢想一手吹和風,一手搞整風。呢個時候,教協表現出嘅姿態究竟有冇腰骨,大家一定要金睛火眼睇實。

 

林勉一

2018.5.6

發表意見