立場新聞 Stand News

資源回收友善政策的實踐

2018/10/8 — 13:56

圖片來源:拾平台 Facebook

圖片來源:拾平台 Facebook

今日(編按:文章見於 10 月 6 日)喺葵涌智芳街,經上次同居民和區議員交流後,正式將一個資源回收嘅社區實驗擺喺智芳街嘗試,我哋一擺低個回收大鐵架,隔籬有個街坊就過嚟下你地喺到做咩,跟住話:「哎,又搞啲咩回收呀?唉死得啦邊到有人會咁做呀!」街坊嘅冷水撥完之後我哋依然故我咁整理下啲用嚟回收嘅設備,再等埋啲義工先至開始同啲街坊宣傳,同記錄回收嘅情況,點知我哋離開咗一陣後,有個朋友話嗰度已經開始有街坊自行將啲發泡膠同紙皮放喺個鐵架度,我哋即刻突眼驚喜咗一陣,感覺件事可以成事,資源回收中心係有可能實現嘅。

而負責喺中間整理垃圾同回收物嘅陳生同蘭姐,都因為有咗個回收鐵架,喺平時嘅工作程序裡面開始調節吓個步驟,將周圍收集到嘅嘢都好企理咁去整理,鐵架裡面嘅回收物又可以好迅速咁執哂喺車仔度拎去磅,而成個過程係真係冇令到塊地污糟,冇污水亦冇穢物,基本上屬於垃圾嘅物品就已經完全放咗喺要擺垃圾嘅車上面,而應該要回收嘅亦好有系統咁放喺回收嘅車仔度,整個工序嘅感覺係專業,衛生同善用咗成個空間,而冇阻礙行人路過或造成危險嘅情況出現。

廣告

資源回收中心嘅社區實踐未必係最好嘅方法,但亦有可能係較容易俾社區唔同嘅持分者能夠參與其中,讓市民能藉參與嘅過程令回收嘅意識提升咗,友善政策嘅推動,並唔係偏袒維護拾荒者利益嘅方法,而係讓唔同階層同身份嘅街坊,一齊互相友善對待,亦一齊友善對待個社區,更一齊嘗試學習友善對待我哋掉出嚟嘅廢棄物同應該要去循環再造嘅回收物。尊重鄰舍尊重社區,更嘗試尊重生態與創造。

廣告

 

拾平台 Facebook

發表意見