立場新聞 Stand News

【識條鐵】東大嶼人工島隱藏高鐵支線大 Fact Check

2019/3/25 — 15:44

本土研究社製圖

本土研究社製圖

前兩日爆出東大嶼計劃原來隱藏了接駁前海的高鐵支線,逼到前海管理局香港事務首席聯絡官洪為民和發展局局長黃偉綸出來回應。但再經我們研究團隊深入調查,可以發現他們的說法相當誤導,以下一齊來 Fact Check:

不是初步構想,而是由黨委提出落實的大灣區政策

前海展示館成幅壁畫咁大嘅大灣區基建藍圖,係咪純粹初步構想?其實本年 2 月 25 日,現任深圳市委田夫已經圍內透露過未來會有高鐵線「從深圳西麗高鐵站過前海到香港東大嶼都會」 。同月 27 日,深圳市政府黨委成員、前海深港現代服務業合作區管理局局長杜鵬,踩到落嚟香港四季酒店出席「前海落實《粵港澳大灣區發展規劃綱要》政策推介會」,更進一步提及研究延長內地高鐵路線,途經前海及「明日大嶼」的人工島,作為配合「國際化城市新中心及未來部署」。

廣告

可見呢條高鐵 2.0,好明顯已經唔係純粹係一個前海管理局小官洪為民講既「初步構想」,而係由黨委提出落實大灣區綱要勢在必行嘅政策,但普通市民竟然到今日重係懵然不知。

連黃偉綸局長都要睇新聞先知?

廣告

無端端剷多條高鐵 2.0 落嚟東大嶼已經好離奇,成件事更加離奇嘅係,發展局局長黃偉綸竟然話睇新聞先知道有呢個消息,話識佢條鐵,咁就證明咗在妹仔特首任內,香港已經進入一個任俾大陸規劃嘅處境。

不過,2 月 27 日嗰場「前海落實《粵港澳大灣區發展規劃綱要》政策推介會」,已經簡單有報導過,你話黨八股文睇唔明重情有可原,但當我哋翻查報導,當日香港政府內地及政制事務局副局長陳帥夫係有份參加呢場會議㗎。

然後,黃偉綸竟然話隔咗成個月都無聽過呢單嘢,咁究竟係咪內地及政制事務局辦事不力,明明呢啲咁高層次嘅會議一日政府內部就應該出哂會議紀錄,成個月咁大個局連出個簡報俾發展局都冇,又咁橋局長成個月都貴人事忙,完全當大灣區規劃綱要嘅新聞係耳邊風?周街捉個小市民問,都會話咁嘅可能性好低囉。

定係政府知之為不知其實是知也,急轉彎扮香港冇被規劃?

原來前海代表一個月前透露兩地政府已在研究中

雖然港官推個波俾深圳話佢地自己一廂情願,但又俾我地翻箱倒籠,搵到官媒《文匯報》一個月前已報導前海代表講過:深圳和香港特區政府正在研究「透過高鐵,通過前海連接至東大嶼新規劃填海人工島」

即係話,呢位大陸官員杜鵬先生,已經揭穿咗黃偉綸(別怪我)同洪為民(我自願)嘅便宜說法,呢條隱藏高鐵根本唔係純粹單方面構想,而係兩地政府已經夾好準備落實嘅大灣區綱要嘅研究,進展已成深港雙城機密。除非係呢位陸官吹大咗,唔係就係你當香港市民係傻仔隨便誤導。

立法會 5.5 億人工島研究撥款 暗藏高鐵支線研究

3 月 26 日政府就會問立法會申撥款做研究,六千幾億包嘅唔只係填海同埋鄰近基建工程咁簡單,睇番份立法會撥款申請文件原來暗藏埋一份《區域性運輸研究》,5.5 億係會包埋入去研究啲「較遠期道路及鐵路」,極有可能批錢研究埋呢條咁區域性嘅隱藏高鐵啦。

依家「明日大嶼」官方版嘅基建藍圖,都有透露有條暫時話會行普通馬路嘅未來可能車行線(R1),走線其實就跟前海展示館擬建嘅隱藏高鐵支線幾乎吻合,同一條走線穿過大東山到小蠔灣北到東大嶼,如果佢未來研究下搖身一變由馬路變多咗條鐵路,咁個終點站就一定唔會係小蠔灣而係大灣區,亦都一定係千億起跳嘅大型豪建高鐵。

更重要嘅訊息,就係話本月 26 號政府就已經暗中拎錢研究呢條區域性高鐵支線啦,而唔係純粹深圳前海一方既構思咁簡單!睇實啲個荷包呀。

FACT CHECK完畢,結論是:

📌 無論是洪為民及黃偉綸對新高鐵支線的最新說法,都自相矛盾站不住腳;
📌 政府暗渡陳倉,東大嶼六千幾億只是暫時「起錶價」,先氹你落疊再層層加碼,同步開展新高鐵支線又會是上千億開支黑洞;
📌 明顯反映香港已經高度被規劃,連負責當局都不看新聞都不知情,就算知情局長都要扮無知;
📌 現時增生咗條前海列出嘅高鐵支線毫無規劃論證、社會討論及民意基礎,證明應先經過公眾諮詢,而非直接繞過民意就拎公帑進行研究。

 

#增生咗條前海列出嘅高鐵支線
#及早揭發及早準備
#黨委話起多條高鐵 
#妹仔娥點敢SayNo 
#東大嶼停撥款
#氹你落疊層層加碼 
#6240億計漏條鐵 
#睇實啲個荷包呀

💡 追縱東大嶼人工島問題回顧
【大型基建超大支】
【東大嶼有條隱藏高鐵】
【承認了 前海想聯通東大嶼】
【大島注 vs 棕田應收】 
【人工島萬能論】 

🙅‍♂️🙅‍♀️ 對抗粗暴「被規劃」 月捐支持本研 💪

本土研究社 Facebook

發表意見