立場新聞 Stand News

【絕望真相】土地供應小組都話:發展新界農地又貴又用唔到?

2018/6/8 — 19:29

本土研究社製圖

本土研究社製圖

土地供應專責小組成員劉振江今日在《信報》撰文,引述《好誠實研究》裡四大地產商多年來囤積農地的數字,然後話佢哋係「不斷耕耘及願意應對現行換地/改地契以及補地價的種種艱難挑戰」、「為創造合適發展土地對香港房地產市場所作的貢獻。」哇,真係多謝哂你哋呀!原來賣樓無錢賺嘅?起到周圍都係豪宅叫做為香港做貢獻。為咗幫政府同地產商開路,咁嘅說話都可以面不紅氣不喘地講得出口,土供組成員真係唔係人人做得來。

篇文仲話我哋《好誠實研究》指出公私合營發展新界農地、可以讓地產商「瓜分過萬億肥豬肉」的講法有謬誤喎。而理由竟然係:
(1) 相關土地發展對環境的影響可能過唔到城規會
(2) 相關土地偏遠、政府不可能不惜成本去為佢哋起基建 
(3) 相關基建配套用地不知從何而來,而沒有基建配套的話,住宅密度一般只能以 0.2-1 倍地積比發展。

言下之意,所謂 1,000 公頃新界農地儲備,其實好多都用唔到,就算用都可能好低密度,或者要政府花好多公帑去起基建。所以就話我哋用 1,000 公頃土地、3.5 倍地積比計算可帶來的潛在收益係誇大。

廣告

咦,但本身唔係你哋土供組講到哩個選項好重要㗎咩? —「不少於 1,000 公頃的新界農地,面積相等於現有全港公私營房屋總土地面積約四份之一。倘若這些龐大的土地資源可以加以利用,將能對本港房屋供應帶來重大的正面作用。」你哋本「貴細擠」諮詢文件寫到咁吸引,我係市民都即刻想揀。而家先至講出絕望真相?咁份文件同個選項係咪應該收返?

本土研究社的立場一向是:若這些農地位置偏遠、基建發展成本好高,甚至因為生態環境因素就不應該發展。不過政府推「公私合營」來勢洶洶,我哋就計下,係幾咁大的潛在利益令到政府要不惜工本去推這選項。

廣告

至於話城規會會考慮發展相關土地對環境的影響,請問劉振江你同小組主席黃遠輝夾好口供未?佢十日前先至在港台節目上講:「不少於 1,000 公頃的農地儲備是公開數字,因為有關土地不能通過城規會批准,所以考慮用公私營合作去釋放土地潛力。」擺明要發明另一個制度繞過城規會、幫地產商釋放土地收益。如果用返城規會一貫考慮環境影響的標準,呢啲土地發展項目根本唔會過到。而家咁講,唔知你背後啲地產商、大老闆肯唔肯過你呢?

如果要指控本土研究社誤導,就請土供組先公開 1,000 公頃發展商農地分佈,清清楚楚讓公眾分析邊度可發展邊度唔可以發展,然後才討論政府土收還是公私合營,否則就請收回呢個選項,免再誤導公眾!


原刊於本土研究社 Facebook

發表意見