立場新聞 Stand News

無聊企管心得

2018/6/26 — 16:25

資料圖片

資料圖片

認識有啲企業管理人,係好沉迷玩權術嘅遊戲。權術嘅遊戲好似搞到好 x 複雜咁,但係講到最底,其實都係分化與及團結群眾,只係當中嘅平衡點樣定。一般嚟講,你手下班人彼此之間越分化,通常越容易管。但係越分化嘅團隊,生產力亦同時越低。嗰班鍾意玩權術嘅企管人,常常面對嘅矛盾正正係呢一個。又要自己個位坐得穩,又要團隊有表現。權術嘅嘢,有時搞一大餐到頭來都係揾自己笨的。

你要一心一意去分化一個團隊,其實並唔困難。真正嘅困難嘅,只係你是否承受得起團隊四分五裂之後嘅混亂同惡果。所以如果,管理嗰條仆街,根本唔介意後果的話,個團隊,基本上係死 x 梗。以前仲後生,覺得未必嘅。而家老咗啦,見識過嗰啲一心搞死下面嘅老細,而且做得毫無顧忌。做佢下面嘅,其實要認真諗吓點樣先可以生存了。

係人都知道,團結會係力量。但係大家都係蝦兵蟹將,都唔係你話想團結就團結得到。團結唔到嘅原因,除咗一個團隊裡面總有幾個見利忘義嘅二五仔之外,人總喜歡對自己以外嘅人睇低一線,硬係覺得,阿邊個只係掛住行街睇戲去旅行,阿嗰個又只係掛住自己有糧出,另外阿邊個又不問世事…總知,因為佢、佢同佢…呢個團隊喺未來三百年都冇可能團結㗎啦。你係咁諗,佢又咁諗,個個都覺得人哋淨係識食瞓痾所以我哋成班今生今世都只會不成氣候,咁可以點呀?我都唯有淨係食瞓痾囉。

廣告

團隊要團結,其實好睇時機嘅。有冇好嘅領袖出現、有冇有利嘅環境,總之都係天時地利…時機唔啱,其實亦只能食瞓痾住先。作為一個仆街嘅管理人,面對如此一個局面,一方面會盡量避免有嗰啲能讓手下團結起來嘅時機出現,另一方面,則會盡量令下屬相信,成個團隊都係烏合之眾,各懷鬼胎,因此即使時機出現,團隊會礙於自我否定,亦唔會團結起來。

做細嘅若要生存,前者冇得搞,只能等運到。後者,唉,其實應該係可以避免的。

廣告

 

#明就明 #講咗等於冇講
原刊於作者 Facebook

發表意見