立場新聞 Stand News

無岸之嶼

2017/11/24 — 13:07

當連個海岸都剔咗出個公園,究竟重應唔應該叫自己做海岸公園?

呢個南大嶼海岸公園嘅出現,本身係因為政府近年來大舉破壞北大嶼山同起焚化爐承諾作出嘅補償。依家最新嘅郊野公園及海岸公園委員會最新嘅文件,話聽左某啲「持分者」意見,就連個岸邊都唔包入去。唔只係發展計劃呃左你接受個補償,依家原來連個補償都係呃你嘅。

真係好懷疑政府做決策班友識唔識生態,點解南大嶼近岸可以搵到咁多魚,就係因為海岸提供左好多空間俾啲小魚棲息同繁殖呀,你唔包入去然後任人捕撈,附近咩江豚、中華白海豚、野生斑、黃腳鱲食咩好?死清光啦。

廣告

之前由梁振英委任嘅大嶼山發展諮詢會裡面班大帝曾經有個驚人建議,想將大鴉洲指定興建「溫泉旅館」。我真係好想問,你邊隻眼睇到香港地下有溫泉眼呀? 即係你呃人?你估啲旅客傻架,咁呃佢地長遠只係做壞自己個朵,或者就只係呃到啲低檔次傻旅客嚟搞爛哂你嘅山水資源,值得咩?

依家土木工程署話「現階段不適宜推展這項建議」,真係唔知佢地想暗渡陳倉通過左個海岸公園邊界先,但佢冇限制之後就再陰啲陰啲重新上馬,呢個林鄭班子最多呢啲陰濕嘢,隨時冼你一獲。

廣告

從環境經濟學嚟講,環境係最值錢嘅嘢,因為佢有著不可代替的(incommensurable)的特質,唔單只係生態,更是我們的身份、認同、景觀、美感、學習、生存、文化之所在,愈擺得愈耐就愈賺錢,可以留番俾下一代享用、發揮與營造。

短視嘅人睇到短暫嘅利益,做錯決定最後必禍延後代。

郊野公園及海岸公園委員會:在南大嶼水域擬建的海岸公園的詳細設計及進展— 索罟群島海岸公園及綜合廢物管理設施第1期補償海岸公園工作文件( WP/CMPB/12/2017)截圖

郊野公園及海岸公園委員會:在南大嶼水域擬建的海岸公園的詳細設計及進展— 索罟群島海岸公園及綜合廢物管理設施第1期補償海岸公園工作文件( WP/CMPB/12/2017)截圖

 

參考資料:郊野公園及海岸公園委員會今日討論文件

作者 facebook

發表意見