立場新聞 Stand News

機師先生,有些機會還不是屬於你的......

2017/6/16 — 13:14

資料圖片:電影《衝上雲霄》宣傳照

資料圖片:電影《衝上雲霄》宣傳照

【文:阿穆】

琴晚有件事喺連登同埋Facebook都幾多人討論:有位(相信係來自國泰嘅)機師喺私人facebook分享自己日前喺八號風球下返工,最終安全返到香港嘅經歷,仲有「兩個可人兒接機」(當事人係咁講)添。當事人出咗post後好快就傳通街,最後有個相信係空姐揸旗嘅facebook page出咗個 post 招呼佢,引來大批花生友恥笑 / 葡萄。

個post鬧佢嘅重點,主要在於喺一片驚濤駭浪之中,其實當事人根本無份做降落。總之功勞係歸於Captain(機長),而唔係呢位小小嘅幼柴SO(Second Officer, 二副機師)……

廣告

咁其實即係點呢?

廣告

就拎國泰做例子。佢哋有自己嘅見習機師計劃吸納新血,俾唔少有志於做機師嘅人去開始佢哋事業生涯。「被選中嘅細路」會去澳洲阿德萊德嘅飛行學校 “Flight Training Adelaide” 接受55週訓練,當中包括學習理論、駕駛小型飛機等,而學員初接觸嘅都係單引擎、螺旋槳嘅小型飛機。其實到學員畢業之前,佢哋都係揸到雙引擎嘅小型飛機,講緊有160小時嘅飛行時數,同埋有40小時喺飛行模擬器嘅操作時數,實在未可以「揸大機」。

好喇,畢業喇,真係可以返嚟香港做SO。但初返嚟三幾個月都係喺赤鱲角居多,因為仲有一啲ground school同埋simulator training等緊你,基本上要過埋呢個階段先至可以去唔同地方周圍飛。

嚟到呢步其實都唔錯,畢竟SO終於可以「揸大機」(Boeing 777 / Airbus 330 etc.) - 但唔好意思,又係有條件。呢度亦可以對應番個facebook page果位admin講緊嘅嘢:原來架大機要去到巡航高度你先有份揸。點解呢?

因為要由頭到尾揸大機係要拎到ATPL(民營運輸機飛行員執照 / Airline Transport Pilot’s Licence),而香港民航處訂下嘅最低要求係1500小時飛行時數。其實一個初入職嘅國泰SO係擁有CPL(商用飛行員執照 / Commercial Pilot’s Licence),而CPL只要有200小時飛行時數就掂到最低要求。其實啲SO都一早讀好晒書,連ATPL嘅筆試都過咗,但就係飛行時數未過,所以一個SO始終要付出多幾倍嘅時間先可以拎到full ATPL。

不過唔緊要,呢個世界上有樣嘢叫 “rating”,就好似打機過關裝道具,附載特殊技能咁。原來民航處有個rating叫做 “P2X”,即係cruise relief pilot,目的就係俾SO可以喺大機去到巡航高度(如冇記錯要2萬呎以上)嘅時候,喺機長嘅指導下上到駕駛席操作飛機。而初入職SO都係被公司調去飛啲勁遠嘅航點,例如北美等地,公司正正就係利用飛行時間長嘅特點,靈活調配幾位機師嘅作息,令到SO可以做到cruise relief pilot之餘,又放到個別機師去眠一眠,而SO就係喺呢個時候儲鐘儲經驗,令佢哋一步一步達成拎full ATPL嘅目標。

但換句說話講,當架機唔喺巡航高度時,包括起飛同埋準備降落嘅時候,SO係冇辦法揸架機。

睇番當事人分享自己嘅經歷,佢就話自己「第一次經歷打風」,飛機下降嘅時候好多亂流,閃電閃到「有幾秒白晒睇唔到野」,雨水好似「100卡鑽石咁打落黎」,但最後都可以喺每小時35海里側風下「完美Landing」準時抵達。有啲形容或者係誇張咗,但打風時候上到空中,天氣差得咁緊要確實唔奇。好在做得機長都係訓練有素,而且依家航空科技咁發達,就算打風嘅時候要起飛降落都唔是mission impossible。不過都係果句,極大程度上呢個都唔是SO嘅功勞。

我唔想估當事人寫個status嘅動機啦,雖然佢係講到似層層,不過佢由始至終都無講到架機係由佢負責降落(量佢都唔敢),我覺得呢度都需要做番一個小小嘅留情。如果退後幾步再正面啲諗,佢根本冇蝦人唔識嘢、蝦人唔知佢嘅工作性質同範圍,我甚至覺得佢有啲無辜添…… 出個如此內容嘅post,難道就一定要俾你笑?始終一個friends only嘅post最後發到出公海俾人指指點點,相信當事人(同埋兩位「可人兒」)都唔好受… 大家食夠花生,就不如打個和啦好嗎?Super!

 

利申:一個對航空業有興趣 + 打算考Cadet嘅small potato

發表意見