立場新聞 Stand News

未審先判,搞到張健華冇咗個專業資格

2017/12/5 — 17:32

張健華

張健華

是日新聞:私營殘疾人士院舍「康橋之家」前院長張健華,涉嫌與30多年前一宗非禮案有關,警方諮詢法律意見後,今日再將張健華拘捕,並落案起訴他5項非禮罪,案件今日下午在東區裁判法院提堂。

警方於2016年10月下旬接獲一名41歲女子報案,她表示在三十多年前在港島一小學就讀時被一名男子非禮,案件經港島總區重案組調查後,一度將張健華拘捕,及至今年8月張曾獲警方暫時釋放。

另外社會工作者註冊局約3年前曾到收到投訴,指康橋之家前院長張健華涉嫌性侵女院友(後來律政司撤銷起訴張氏),社工註冊局轄下的紀律委員會原擬就投訴展開紀律聆訊,但張指未有收到局方正式通知,拒出席有關聆訊。根據社工註冊局的註冊社工名單,張健華目前的註冊狀態為「尚待續期」。

首先要表明,我一向支持受害人報警,呢個立場冇變,所以以下講的,與此無關。

按近日網絡裁判員的邏輯,可以咁樣睇呢單新聞:

廣告

1. 三十幾年前喎,三十幾年前你唔報警,三十幾年後先報警?楊過都係等小龍女十六年,你等足一倍時間先去報警?有乜可能?有乜邏輯?你呃我唔到,你一定係想上位啫。

2. 十年前發生的事,都已經話冇證冇據亂吹都得,三十幾年前喎?香港都仲係英治的樂土啦陰功,今日先嚟告?一定係誣告,一定係想網民幫你集氣,一定係想做KOL,開個性侵PAGE基本。

廣告

3. 呢三十年,張健華畀咗咩好處個女事主?點解佢唔講出嚟?佢應該要一一交代。

4. 張健華三年前涉嫌性侵女院友,但女院友作唔到供,律政司撤銷起訴。咁點解個社會未審先判?點解唔畀番個社工牌佢?點解仲係「尚待續期」?

5. 你知唔知呢個女院友咁搞法,搞到人哋專業資格都失去埋,冇埋份工,好慘架?個受害人告唔入,應該賠償添啦。

6. 之前呢個張健華已經新聞多多,啲新聞留言,包括今日報道下面嗰啲,個個都未審先判,對張健華好惡毒,你哋咁樣係唔啱架,佢冇畀人告入架喎,依家都唔係一定告得入喎,點解你哋個個未審先判?

嗱,所以我早兩日都話,受害人係應該報警的,你報警,網民的態度會一百八十度轉變,個疑犯無罪都畀人咒到有罪,個個就會質疑黑警唔做嘢玩個受害人架啦。

新聞補充:張健華於2014年曾牽涉一宗涉嫌與年輕智障女院友非法性交案,惟因女事主患創傷後壓力症,不宜出庭作供,律政司最終於2016年5月撤銷起訴。當時張健華還要求取回訟費,被法官拒絕並指撤控是無奈及屬社會不幸,此案才引起廣泛關注。

亦都可能因為咁,本案的女事主三十幾年後才在2016年10月決定做「metoo」,挺身舉報。

 

P.S. 涉及風化案的文章,本人都唔會也唔敢輕率或輕佻去處理,所以今次曲線要講明,如果受害人咁啱睇到,請諒解。

作者 facebook

發表意見