立場新聞 Stand News

引消息沙中綫抽驗首批3枝鋼筋接駁 全不合格 田北辰:嚇死人!無眼睇!

2018/12/19 — 17:16

沙中綫紅磡站工程接連爆出醜聞,最終要鑿開石屎牆檢驗,本月10日開始鑿牆。實政圓桌立法會議員田北辰引述消息指,港鐵今早在其中一個開鑿點,抽驗第一批3支鋼筋,結果全部不合格。他又指從外觀上看,抽驗的鋼筋看似完全扭入螺絲帽,但內部其實當中有虛位,「即係話有人剪短咗」,他認為抽驗頭三枝鋼筋全部不合格,「比率高到嚇死人」,「我都無眼睇將來係點樣」。

田北辰今日引述消息指,港鐵上星期開始,分8至10隊人鑿開紅磡站連續牆石屎檢查,今早開始開始檢查鋼筋接駁,其中第一批抽驗的3枝鋼筋,經超聲波檢查後,「3枝都扭咗入去,但入面就唔係實嘅,有好多空位,即係話有人剪短咗」,他認為抽驗頭3枝鋼筋都有問題,比率極高,完成檢查後情況如何「無眼睇」,《蘋果日報》就引述他認為情況「好大鑊」,「如果抽樣都係咁就死梗喇,拆(紅磡站)梗喇。」

另外,《香港01》亦引述消息報道,今日抽檢3枝鋼筋,全部不符屋宇署標準。報道引述消息人士指,港鐵今早檢測一組3枝鋼筋,根據屋宇署監控標準,鋼筋完全扭入螺絲帽,絞牙長度應有44毫米,但這3枝鋼筋,絞牙扭入螺絲帽的長度分別只有29毫米、34毫米及34毫米,不符合屋宇署要求。檢測時政府、港鐵以及承建商禮頓的專家均在場。

廣告

 

廣告

發表意見