立場新聞 Stand News

【土地大辯論】俾佢哋贏咗,香港人真係輸一世!

2018/5/14 — 13:48

政策.正察短片〈【發展棕地困難何在 三位前規劃署長拆局】〉截圖

政策.正察短片〈【發展棕地困難何在 三位前規劃署長拆局】〉截圖

今次真係激嬲咗我了...

土地大辯論,地產商為地產利益、鄉議局爭多啲丁地、林鄭月娥為找數配合大灣區融合、土供組要為既定方向護航,無可厚非。咁你哋呢3個規劃署前高官呢? 

廣告

都退咗休,做乜野重要走出黎誤導公眾,散佈迷思,重咁無恥從你哋把口咁講棕土問題? 咁多年黎新界棕土問題惡化,違規嚴重、破壞鄉郊水土、土豪割據、橫洲黑幕,正正就係你哋3個垃圾規劃高官治下做既好事呀! 今日重走出黎講風涼說話?

幾年前我哋率先講棕地問題,個陣你哋班官連隻眼睇都睇唔到呀。然後就想盡任何方法,講到棕地唔係地,咁就可以扮唔知唔駛處理,就想唔駛再為你哋之前做錯既事去解決贖罪?

廣告

唔知你哋當日係扮盲定扮啞,我肯定今日你哋一定扮聾。你哋今日再重覆既point,民間一早全部答哂你啦 (睇番《棕跡2015》! 為免誤導市民,我必須完整再講一次:

官:棕土零碎難開發。

(我哋搵到成千公頃既棕土群都係2公頃以上,你哋講零碎根本冇準則!)

官:影響好多臨時作業。

(咪建議咗重置囉,重置得既就重置,大型既機器都冇理由俾佢亂放鄉郊,你自己都研究緊啦,冇野搵野黎講!)

官:發展棕土會令棕土擴散。

咁你哋點解在位個陣唔將棕土凍結? 點解依家唔爭取? 點解唔收番啲破壞咗既棕土修復,一味識得消極咁拎啲技術理由講棕土唔拈得?)

官:棕土我哋依家處理緊,睇下洪水橋。

(混淆視聽! 你係劃個新發展區中間有用到棕土,唔代表你係有全面既棕土政策呀!)

官:棕土有路入唔代表發展到,水利好難。

(地產商囤積啲農地,連路都冇政府就出公帑幫佢鋪橋搭路,都話可行呀,玩野!)

官字兩個口,依家有3個官就等於6個口。我睇著呢班官毫不羞恥地侃侃而談,唔單只為香港居住問題感到悲哀,我覺得喺香港做規劃建築既專業真係連尊嚴都冇,你哋社會上都有一定地位,睇著呢班行內最大粒既野,係咪連講番啲獨立聲音都咁困難? 一定要盲目咁靠攏利益權威,你哋先有運行?

我哋民間研究組織只係得一支筆、一把口,唔似團結香港基金日日搵番啲未玩夠既過氣官員拍片走出黎散佈迷思,班官重要走入大專院校操控下一代青年規劃者既意識型態,禍延下代。其實我好多野都可以好易接受,就係睇唔過眼俾班利益集團操弄專業知識來愚弄市民。

所以,儘管今日公關當道、資訊扭曲、愈來愈多人扮民間扮中立,但土地大辯論,大家真係唔可以輸,唔好俾呢班人得逞。俾佢哋贏咗,香港人真係輸一世!

 

(標題為編輯所擬;原刊於作者 facebook

發表意見