立場新聞 Stand News

唔好再講咩外國都係咁 DKLM

2018/10/16 — 15:34

港鐵四線故障,肯肯定會有人話,「唓,外國都係咁啦,xxx 都係咁,yyyy 仲衰啦」,然後一套香港廢青身在福中不知福論調。

係,鐵路會壞,外國都係咁,不過呢……

好多外國會有公營、私營鐵路,一間鐵路跪低,會有替代方法,香港?一鐵獨大,巴士 cut 小巴又 cut,政府迫你坐港鐵,港鐵又成日壞。

廣告

好多外國有完善單車徑,市中心 CBD 都可以踩單車,香港?踩單車過對面街都成問題,唔通踩單車過海咩。

好多外國核心區域有道路收費系統,其他地方好小會大塞車,香港?地鐵一跪低全港塞車,道路系統超負苛。

廣告

好啦,唔講交通,講其他,例如工作環境。

好多外國推動 home office,返唔到公司可以留喺屋企做,香港調轉,我哋推動 office home。

好多外國僱主體諒員工返唔到工,香港打完風都迫你調假、扣勤工。

好多外國工會好有牙力,老闆唔敢無理解僱刻薄工人,香港最大工會係工聯會,無集體談判,打工仔慘過做奴隸。

所以話,唔係香港人好鍾意返工,而係無得唔返工。

例如,好多外國人祟尚自由身,唔返工當抖下無壞,香港唔返工自由身叫廢青。

例如,好多外國人無工開,大不了唔買樓短租間房,香港無工開連劏房都租唔起。

例如,好多外國人長期搵唔到嘢做可以靠社會保障,領失業救濟,香港靠綜援屎都有得你食。

例如,好多外國人無樓無錢老來可以靠政府養,香港 MPF 係益基金佬,無全民退保,公屋排唔到,院舍排唔到。

又例如,好多外國會做人口規劃,因應社會基建調節人口,香港?單程證審批權自己話唔到事,個城市迫到爆仲日日有人踴落嚟,但政府又叫香港人搬上大灣區。

咁問題到底喺邊?

好多外國會有權揀政府,要求個政府做到上面提到好多「外國都有」嘅事。

香港?手中無票、袋中無錢,上無片瓦遮身,下無立錐之地;一鐵獨大,人口過剩,社會權力失衡,老闆話哂事、勞工被剝削、社會無保障,唯一同「外國」睇齊,就係地鐵都會壞車。

所以,唔好再講咩外國都係咁,講起就把幾火,DKLM。

Google Map 顯示港島九龍區多條主要幹道大塞車。

Google Map 顯示港島九龍區多條主要幹道大塞車。

作者 Facebook

發表意見