立場新聞 Stand News

呢鋪真係「大愚人工賭」

2018/10/10 — 17:03

香港夠樓俾香港人住,不過係唔夠俾人(主要大陸資金)炒。而家揼一萬億落海(起人工島),一方面承擔極大氣候壓力,另一方面根本唔知到 2032 年落成時,香港仲係咪有咁大需求。大陸經濟會唔會跌?肯定會,只不過係崩塌式、災難性,還是在可控範圍。如果係前者,填咗 1,700 公頃出嚟要俾邊個投資/炒賣?到時現有樓盤可能放售都未必有人要。而家根本係跟住強國夢幻想未來經濟會欣欣向榮,但你我都深知現有經濟結構同埋國際角力下,強國夢會好快破滅,面對一次又一次嘅危機。林鄭月娥係將香港庫房豪賭一鋪,押落幾近必輸嘅一方:呢鋪真係「大愚人工賭」。

官場中人曾言,要將香港發展成新加坡咁。喺新加坡,會唔會起一個為咗領功、大而無當,洗咗接近一千億嘅高鐵?會唔會起一個風險咁大嘅人工島計劃?會唔會無啦啦將你納入「大灣區」,安排一個史無前例嘅領導小組,然後將你燉冬菇變成國家融合發展嘅其中一個齒輪?

維持奉迎上司、獻媚送禮、不斷接收政治任務嘅官場文化,香港係唔會做到 for the people,只有 of the PRC、by the PRC and for the PRC。喺咁嘅情況下,無論特首係咩人,都只能結構性地變得無能,用被吸乾吸淨嘅殘羹剩飯餵食港人。

廣告

 

(標題為編輯所擬,原刊於作者 Facebook

廣告

發表意見