立場新聞 Stand News

係咪吋土都不能讓呀!

2017/6/4 — 12:10

香港仔郊野公園(資料圖片)

香港仔郊野公園(資料圖片)

中原城市指數連續十五個禮拜創新高,即係話樓價繼續上升,市民都抱怨樓價高負擔唔起、投訴要住納米樓、怪責發展商貪婪、罵爆特區政府無能。

平情而論,特區政府都做咗唔少工作去壓抑樓價,但一日最核心嘅供應問題解決唔到,樓價都係持續高企。香港面積就係咁大,市區可發展空間幾多,大家心裡有數;要拓展新界土地,除咗環保人士大聲抗議,搞賠償搬遷又困難重重;好喇你話填海,啲保護海港人士死唔妥協,咁你話去邊度增加土地。

政府提出發展1-2%郊野公園用地,其實都係冇辦法中嘅辦法,畢竟郊野公園面積龐大,只用少許土地,對整體影響有限,而且沒有搬遷及賠償的問題,對推進建屋進度有極大幫助。然而政府都未話正式要起,只係話做做研究,有人已經話不能接受,更加大聲疾呼話「吋土不讓」。

廣告

一吋也不能少?

講真,土地係十分有限嘅資源,呢樣話唔得,嗰樣又唔郁得,咁啲地喺邊度變出嚟?土地唔係一件普通產品,例如衣服、汽車或傢俬,可以喺工廠大量生產,係咁多就係咁多,特別今日香港,要發展,不得不作出取捨。當然大規模咁做係會破壞環境,但係咪嚴重到騰空一丁點也不可能,甚至連傾嘅餘地都冇呢?

廣告

有啲人話將市區啲樓起高啲咪得囉?呢方面就只係將問題簡單化,先唔去爭論市區有冇土地;要建屋發展,唔係話起多啲樓宇面積就得,要考慮整體規劃及交通,即居住多少人口,需要預算多少社區配套,而影響最大係交通,你搬咁多人入某個地點,交通係咪可以負荷得到。

探討吓冇壞啫!

至於新界土地,你話發展棕地咪得,喂!棕地都有佢用途,你攞咗嗰幅土地,都要諗諗點去解決啲貨櫃安放問題,縱使香港已經唔係世界第一貨櫃港,但日常處理嘅貨櫃量仍然龐大;況且要搬遷棕地上嘅行業,肯定有好大反對,唔係一時三刻可以解決。

大家點解唔可以略為妥協,嘗試探討吓,發展少量郊野公園地係咪可行?事實上喺今日樓價超高環境下,探討不同方案好合理,否則要望樓價跌,不如望自己發達好過。

 

發表意見