立場新聞 Stand News

高鐵豈止公關災難

2018/9/10 — 11:00

《廣深港高鐵(一地兩檢)條例》九月四日凌晨開始實施,運輸及房屋局局長陳帆(右)將內地口岸區的圖則交予深圳市人民政府副秘書長楊修友(左)。

《廣深港高鐵(一地兩檢)條例》九月四日凌晨開始實施,運輸及房屋局局長陳帆(右)將內地口岸區的圖則交予深圳市人民政府副秘書長楊修友(左)。

看見香港記者要自己提前幾日排隊買高鐵頭班車票,真係好心噏。究竟高鐵是屬於香港人的嗎?由一地兩檢審議,到被揭發有隱藏樓層,再被揭發車站有高達700名內地執法人員,然後又有傳媒報道港方要求不實行「失信人制度」不果,變相令內地一套列寧式數碼監控制度伸入香港。大家唔明白點解工作交接儀式完全冇photo call,而開放日只準新華社採訪,最離譜就係千億工程完成首班車都唔安排記者採訪。大家千祈唔好以為港鐵公關是省油的燈,處事甩漏、反應遲鈍之失常行為,反映高鐵背後更深層次問題。

高鐵的詭異現象來自「鬼鬼祟祟」,工程耗費鉅大,按道理政府應對通車大肆宣傳,但點解工作交接儀式要暗地進行,而特首事後又否認係儀式,連指定動作安排記者坐頭班車亦拒絕呢?大家第一時間反應係must be something,有啲嘢隱瞞。700人進駐一個車站口岸邊檢,根本不合常理,然後預留隱藏樓層一直唔公佈,立法會審議法案呈交的圖則亦冇此設計。呢700人究竟做乜?檢查證件要700人,冇人會信。

高鐵雖由港人血汗錢興建,但揸莊係大陸,港鐵及港府只係執行的奴才,唔敢質疑主人安排。隱形人政務司張建宗拍心口寫包單話內地人員不會出現在非口岸範圍地方,大家會信咩?你張建宗憑甚麼保證?本來香港公務員及港鐵公司都知道香港一套核心價值,就是開誠布公,任記者問任記者影,所有陰謀論就會消散,偏偏突然失常,好明顯係香港一套已被大陸一套官本位價值取代,大陸官員認為本地傳媒阻頭阻勢,不安好心,點解要討好佢哋,於是連帶毫不敏感的宣傳活動頭班車採訪也拒絕。

廣告

由於呢種內地「官威」病毒已通過高鐵輸入,也種下了日後高鐵通車將負面新聞不絕,林鄭、陳帆今日屈從內地,最後會自己全部「食晒」。頭班車要記者排隊購票一事已經怨氣沖天,大家正等候通車後的種種甩漏,盡責地全方位揭露。本來高鐵超支納稅人被迫硬食,都算啦,但原來根本唔係當初承諾那回事,大部分去深圳福田,去廣州南站車少,入市區又耐,於是轉頭推銷去潮汕福建那邊,但又發現要火車調頭都要成20幾分鐘,問你死未。如果吓吓靠去深圳轉駁內地高鐵網,成千億起條高鐵為乜?而更深遠影響是內地官僚資本主義一套,即「中國模式」輸入香港。

呢種借基建提振GDP的模式在內地或一帶一路國家可能得,因為唔需要問責,內地省市官員當係政績工程交到數,至於一帶一路國家,接受中國基建貸款援助,自己又有得落袋,何樂不為。唯獨是香港高鐵既無內地援助,全部香港人真金白銀科水比承建工程的央企,不斷超支填氹,未計之後營運虧損,條數香港人仲有排孭,對香港經濟發展有何影響?大家都講唔出具體,官員一味吹總之就有好多長遠利益。

廣告

河套、高鐵、港珠澳大橋巨額資本投資,但香港社會繼續貧富擴大,老人服務、公共醫療爆煲,呢種「中國模式」,係咪真係有利香港人,抑或只是有利搭上這架官僚資本主義高速快車的人,大家好快知道。

 

原刊於蘋果日報

發表意見