立場新聞 Stand News

邪惡卻往往最懂得利用愚蠢

2018/10/22 — 10:23

我哋成日都話,嗰啲去咗移民外國嘅人,拎住個外國護照,然之後表現得好鬼愛國愛港係虛偽。這類人,我認識唔少。然而佢哋係咪個個都虛偽呢?坦白講,好多都唔係。至低限度,佢哋自以為此時此刻,佢哋嘅「愛國心」係堅的。與其話係虛偽,我比較覺得佢哋係「愚蠢」多一點。

其實我覺得咁先係大大鑊。

人在自由嘅西方國家,遙望香港嘅嘈吵,可以感受到啲乜?冇人喜歡嘈吵,而本地人要出聲,係為勢所逼。你感受到嗰份壓逼,自然會體諒出聲嘅人。你甚至應該多謝仲肯出聲嘅人,否則情況會更差更壞。但你遠在寧靜嘅西方,實情係你乜都感受唔到,見到遠處有人嘈吵,心裡只會諗:「乜啲人咁煩㗎?」

廣告

我離開咗外國好多年,仲住喺外國嘅朋友同樣時不時向我complain,當地社會教育又點點點唔好,醫療又點點點唔掂,政府又點點點唔好。外國地方有冇嘈嘅聲音?一樣大把。你遠在香港生活,你唔會亂咁批評你喺外地嘅朋友對佢地政府嘅反對意見,同樣嘅原因係,你早已感受唔到佢地所承受嘅困難。我只能聽你嘅訴苦,但支持與否,我其實冇乜條件去講。但當掉返轉頭嘅時候,情況往往又唔係咁。你遠走西方十九幾十年,真係仲能感受到今天香港人嘅困惑?你對香港嘅印象,係咪仲停留喺,90年代嘅美好日子?所以你會覺得,喺美好日子裡面complain嘅人係有問題?

人嘅見識係會過時。當過了時而不自知,而且仍然要堅持指點江山,咁應該唔算係虛偽,而是愚蠢吧。

廣告

虛偽可能仲有得救。但愚蠢,我就唔知道了。

而邪惡卻往往最懂得利用愚蠢。

作者facebook

(標題由編輯所擬)

發表意見