立場新聞 Stand News

我的「工作」日記

2018/10/18 — 9:52

是咁的,近日接咗個熟客的大大大 project,不過同佢點爭拗,大家評一評我有冇道理!

話說客人發現間屋唔夠地方用,叫我想想辦法,其實間屋本身都唔細,有萬幾兩萬尺,仲有個大花園、大泳池同網球場,而且有好多房間都只係擺放雜物。

初頭我想用整咗大花園先,但佢又強烈反對,最後我決定將個大泳池填平,之後就可以在上面起多幾間屋,咁樣就可以多好多空間用。我求其講大約「4、5千萬應該走唔甩」。

廣告

客人反應竟然好大,反對我咁做,佢話泳池得一個,填咗就冇,仲問我點解唔先用咗個冇乜點用嘅網球場同堆放雜物的士多房。

佢同我講,雖然自己有 D 錢(大約都有億幾 Cash),但成副身家都係老豆剩落,問我做咩要咁大工程用佢一半身家填個泳池,佢仲話如果包埋其他物料、延遲、後加數同額外開支,分分鐘用晒佢成副身家咁話。

廣告

我:工程其實係分開好多階段做,唔係一次過拎晒出嚟,你唔係對自己財力咁冇信心呀嘛?!如果第時唔夠錢,最多咪問銀行借囉。其實成個泳池有 1,700 呎,價錢係咁上下!

客:個泳池乜唔係 1,000 呎咩?!

我:其實實際數目「我唔知」,亦「唔記得」1700 呎點得返嚟,總之我覺得填多少少是需要的,有多用來做儲備都好,其實我幫你決定咗啦,亦已經安排師傅準備開工添。(反正佢秘書同會計係我自己人,最後都會開支票俾我。)

佢竟然大發雷霆,質問我點解可以咁做,仲一口咬定我要用晒佢全副身家。

我:請你理性一點,唔好過分揣測,其實今日唔需要糾纏填個泳池係1000呎還是1700呎,因為我都係分階段去進行,而咁大型嘅工作裏面,今日講任何數字比你聽,都係冇乜大嘅意思,因為我連詳細的研究都未做、設計都未做、究竟用什麼方法填個泳池都有好多嘅探索空間,所以今日實在難以提供一個預算案或者預算上限,我哋一定要按部就班咁做,總之我就在「明日之後」開工呀!(我其實想講多句,我都食硬你!你吹咩!)

大家評一評理,佢係咪好離譜!我咁專業!到底有咩唔啱!

(註:唔記得同大家講點解佢屋企「唔夠用」,其實個客已經仔大女大,本來「人口增長」都好穩定,只係佢個由阿爺當年請返嚟嘅老管家,唔知點解不斷邀請D三唔識七嘅疏堂親戚來居住先搞到間大屋唔夠住,但係個老管家揸大屋鎖匙,客人都冇辦法。)

***********************************

你俾我呃咗幾多段先知道中伏?🤣🤣

期待其他服務性行業版本訴說自己的苦況。😋

#圖文不符

(原刊作者 facebook

發表意見