立場新聞 Stand News

【懶人包】逃犯條例,關我咩事?

2019/5/31 — 18:58

睇政製圖

睇政製圖

政府提出逃犯條例修訂引起極大爭議,有唔少支持修訂嘅聲音認為,只要「行得正,企得正」,修例自然唔關自己事。但今次修例係咪真係同你無關?平時唔掂政治就一定無問題?我哋通過唔同方面,分析今次修例對一般小市民嘅影響。


外商撤資ㅤ經濟倒退

透明、公平嘅司法體制,係香港同中國最大嘅分別,亦係本港金融制度嘅基礎之一,給予外商信心投資。然而通過咗逃犯條例修訂,香港法律制度上嘅獨立性會備受質疑,亦唔再係商人嘅安全港。除咗面臨在港被引渡嘅風險,逃犯條例亦容許內地當局充公疑犯在港嘅資金。

廣告

現時眾多外國商會都對修訂有所質疑,佢哋為咗確保業務同資金嘅安全,唔排除會將重點業務同資金轉移去其他城市,甚至減少係香港嘅投資。資金流走,將會影響樓市、股市下跌,到時經濟不景,金融體制動搖,你仲可唔可以置身事外?

廣告


對外關係ㅤ汲汲可危

早前歐盟同埋成員國對港府發出外交照會,對逃犯條例修訂表達憂慮,美加等國亦都對修例表達咗疑慮。多個國家都明確表示,一旦修例通過,將會有升級行動以示抗議。

前中央政策組顧問劉細良指出,香港國際地位從此將會崩潰。香港同各國關係惡化,甚至有機會面臨被制裁、取消免簽證等安排,窒礙對外貿易、經濟發展,對每個人都會有切身影響。


宗教界:寒蟬效應

近年中國以極大力度打壓教會,強拆十字架、禁止教會聚會。即使港人支持內地嘅地下教會,亦有機會誤墮法網。前車可鑑,2002 年港商黎廣強就因為運送聖經到內地,被判處兩年徒刑。

一旦修訂逃犯條例,即使身處香港支援內地教會亦汲汲可危。2015 年,就曾經有深圳官員警告香港牧師唔可以係香港向內地人傳道。崇基神學院院長邢福增質疑,即使當局表明宗教罪行唔會引渡,當局仍然可以強行以經濟罪行引渡。當係香港同內地教會交流、合作都會面對被引渡嘅風險,寒蟬效應將會係宗教界漫延。


文藝出版界:更多的林榮基

而家香港唔少藝術同文化創作人,都會係中國內地有工作,包括到內地演出,出版書籍係內地銷售。面對中國法治水平遠遠低過香港,你又有無把握過去自己嘅創作、言論唔會觸犯中國法律?

喺銅鑼灣書店事件,林榮基、李波等人只係因為喺香港出版「禁書」就被內地拘捕,一旦通過逃犯條例修訂,香港就唔再係擁有出版創作自由嘅安全港,屆時從事文藝創作,就必須小心翼翼,避開當局朝令夕改嘅紅線。當局唔再需要勞師動眾越境執法,只需要提出引渡,就可以拉你去內地,創作、出版自由蕩然無存。


「危害國家安全可引渡」

有左派報章引述國務院副總理韓正同港澳辦主任張曉明,指出一旦香港人喺香港觸犯危害國家安全嘅罪行,亦有機會被引渡。資深大律師余若薇批評,當局亦可以任意羅織罪名,唔一定要以危害國家安全為名引渡。被引渡嘅紅線,根本無人知曉,存在極大嘅不確定性。

他日小編再寫一份類似嘅懶人包,又會唔會被視為危害國家安全?你而家 like 咗呢個 post,又有無機會被引渡?呢啲問題,無人答到我哋。你同我嘅言論、集會、結社自由,危在旦夕。


~ 講咗咁多,我哋而家有咩可以做?~

面對來勢洶洶嘅逃犯條例修訂,唯一嘅希望就係形成巨大嘅民意壓力,你又係咪願意行出嚟?

(1) 簽聯署

而家社會各界同各大院校都有自發聯署反對修例,亦有全球聯署正在進行:學界/各界反修例聯署整合

(2) 6 月 9 日上街

民陣喺 6 月 9 日發起遊行,號召市民上街反對修例。

日期:6 月 9 日(日)
集合地點:銅鑼灣東角道
時間:下午3時
遊行路線:銅鑼灣東角道遊行至金鐘立法會

 

睇政 Facebook

發表意見