林彥邦

林彥邦

傳媒人,涉足報章、電台、電視,沉迷文字,喜愛說故事,希望成為擅長說故事的人。

2018/4/25 - 18:56

建制派更屎 但唔係你同佢一樣咁屎嘅理由

許智峯(無綫新聞片段截圖)

許智峯(無綫新聞片段截圖)

搶人嘢錯就明顯錯到離譜,唔講咩關唔關公,而係明顯犯錯危機出現,作為政黨、作為政客點樣處理。

第一,要真誠認錯。

致歉對象除咗事主,仲有公眾,再躹躬道歉好基本。

廣告

但結果?事主認錯,對象只係受害人,無公眾份,無躹躬,甚至有人兜口兜面問佢點解唔躹躬,都只係重覆一次自己做錯咗,咁你以後仲好唔好意思話鄭若驊,話政府人肉錄音機?

第二,唔好玩語言偽術。

咩叫「喺事主無同意之下攞走」?唔使查字典、唔使問Ben Sir都知,人地唔同意之下攞走,就為之搶,咁以後你對住689仲有無資格話佢語言偽術?

第三,唔好轉移視線。

結果事主花咗好長時間話政府狗仔隊侵犯議員私隱,會去跟進云云,呢個原因可唔可以合理化你本身嘅行為?唔得,咁你講嚟做咩?係推卸責任定轉移視線?

再者,張建宗早喺你出嚟交代之前已經講咗,私隱專員公署已經睇過政府狗仔隊,唔涉及侵犯私隱,你跌咗落地連沙都拿唔返,只會令人覺得你死雞撐飯蓋。

路邊風聲話,有人覺得應該要躹躬道歉,但有人又唔肯,whatever,但係公眾只會見到你成個政黨整體點處理,答案係食咗屎咁。係架,建制派絕大部份時間更加屎,但呢個絕對唔係你同佢一樣咁屎嘅理由。

又,上次長毛搶馬紹祥份文件點解無俾人小?因為事涉公眾利益,公眾自然明白,今次?只係純粹白痴,而事後嘅處理更加係離晒大譜。

 

(標題為編輯所擬;原刊於作者 facebook