林彥邦

林彥邦

傳媒人,涉足報章、電台、電視,沉迷文字,喜愛說故事,希望成為擅長說故事的人。

2018/7/17 - 19:47

厲害了 我主任

細個讀書,學校訓導主任係恐怖嘅代名詞,時至今日,先發現少年真係太年輕,訓導主任同香港其他「主任」完全無得比。

例如助理社團主任,一個人就可以保障國家安全,決定一個組織係咪危害社會安全,仲可以監察埋有無勾結外國勢力。

留意返,就算你無主動去搵主任,主任都會主動搵你,因為只要一個人以上就已經係組織,假設每兩個人就係一個組織,而呢啲組織全部唔重覆,香港已經有 400 萬個組織,而主任 is watching you。

廣告

又例如選舉主任,佢會決定你係咪擁護特區政府同基本法。更厲害嘅係,就算你簽哂確認書跪喺度話痛改前非,主任都會睇你 Facebook,搜集你剪報,用埋內置測謊系統決定你政治主張,所以話,主任比你本人更清楚你心底諗咩。

仲有驗船主任,記唔記得南丫海難呢?事後追究問責負責海事安全嘅海事處,要上身坐監嘅就係海事處「高級驗船主任」蘇平治,而阿處長廖漢波咩事都無安全退休,成單海難原來又係主任搞出嚟,問你怕未。

唔好唔記得入境事務主任。英國佬羅哲斯唔可以入境,李波可以自己出境,特區政府話係依法辦事,做決定嘅咪又係入境事務主任,服未。

不過講到尾,最厲害一定係西環位主任,香港所有主任都以佢馬首是瞻,同特首多啲行埋一齊又得,叫大家快啲立 23 條又得。

呼籲識趣快啲向掌握香港國家安全、出入境政策、選舉權以至船隻安全嘅主任宣誓效忠,主任好嘢、主任萬歲!

 

原刊於作者 Facebook