立場新聞 Stand News

今次唔可以係 endgame

2019/6/11 — 17:20

6.9 大遊行

6.9 大遊行

先講明,認真擔心呢幾日行動現場有人傷亡,所以希望朋友們出發前都有幾點心理準備。無論行動派定溫和派,去行動現場之前都要諗清楚。經驗尚淺,稍作分享。

第一,自己有無心理準備,有幾大程度的準備。無人會唔怕被拉/被打,面對恐懼,我哋點樣準備都係唔夠。但呢種準備係提醒自己,去咗或者無去,都唔好後悔,我地係考慮過風險、承受程度,同埋對理想嘅堅持,我地先去做。真真正正屬於自己的決定。

第二,在運動中我哋的位置。運動唔止係發生在行動現場,無論在自己家庭、職場、社區等,都係運動嘅一部分。而自己能夠付出幾多,擔當咩角色,事前都要考慮清楚。明白有人會因為無一齊衝而感到內疚,但要明白,衝與唔衝都唔係講玩,若在無準備下行動而受傷或被捕,自己會從此被嚇怕,身邊嘅人亦可能會受傷。因此,唔需要勉強自己上前線,唔係所有人都衝得,做自己擅長嘅事情就足夠。不在行動現場的,可以做宣傳、街站、factcheck打擊謠言、組織身邊人等;在行動現場的,可以準備支援物資、後勤、急救、掩護其他行動者等,咁樣場運動先能夠互相補位。

廣告

第三,答應自己,去到咩情況自己要停落黎,冷靜一下頭腦。現場情況一般都難以預料,不確定的除左係對手,更加係自己。自己試過好多次,去到現場一腔熱血,做左好多本來無預過會做的位置,而事後係會為個陣嘅頭腦發熱而後悔,亦因為連累戰友而耿耿於懷。亦有見過滿腔熱血嘅朋友,在無預備下被拉,之後就嚇到唔敢再出黎。運動多數都係持久戰,唔會一兩日就打完,所以事前記住去到某啲情況,一定要提自己冷靜返個人,先繼續行動。

最後就係,一直都覺得,今次唔可以係endgame。不論勝負,中共政權一日不倒,未來仍會繼續影響香港局勢,下場戰役好快會來。反抗者搵到適合嘅位置,反抗運動先能夠恆久。大家小心,街頭見。

廣告

原刊於作者 facebook 

發表意見