立場新聞 Stand News

《逆向誘拐》呈現的世代矛盾

2018/11/7 — 18:17

電影《逆向誘拐》劇照

電影《逆向誘拐》劇照

我好日都唔睇場戲,更加唔識寫影評。今日無啦啦寫,好明顯呢篇應該當係廣告啦。

咁我話明俾你聽呢篇可能係廣告,而我又同你講,套戲其實都幾好睇喎,咁你信唔信我呢?

《逆向誘拐》係推理小說改篇。原著……我係冇睇過嘅。會睇套戲,係因為其中一位劇組相關嘅人,係我認識嘅朋友。諗住都係俾面捧個場,點知,有啲驚喜。

廣告

個故仔,係講一單網絡嘅綁架案。不過呢個對我嚟講其實唔係重點,驚喜嘅位係,電影裡面講咗唔少,有關年輕一代同上咗位嗰一代人嘅矛盾。我唔敢講話拍得好細緻動人,不過睇住故事裡面嗰種世代矛盾,其實係幾有共鳴嘅。電影裡面描述嘅中年人,係一班,過咗時而又不自知嘅人。平日風平浪靜,呢種「過氣」嘅問題,唔會好明顯地表露出嚟。憑籍住社會地位上嘅優勢,我哋呢啲老鬼,平時依然可以喺度印印腳扮大佬,識少少就可以扮代表。但當有嘢爆鑊,老鬼焗住面對危機嘅時候,「過時」嘅問題就會表露無遺。去到嗰個時候,做老鬼嘅,到底選擇繼續死撐吖,還是低低地摜一鋪?← 導演係咪真係有心想表達啲咁嘅嘢我就唔知啦,不過,呢個「主題」,卻係喺我腦裡面留低最深嘅印象。

套戲,都仲有好多幾得意嘅暗示嘅。做過 IT 嘅,應該都會有啲感受嘅。有啲位,明就明,唔明,就一世都唔會明㗎啦。

廣告

我聽過有人睇完話,完全睇唔明。我……其實係好唔明點解佢會完全睇唔明。雖然,如果你真係有返咁上下老,網絡年代真係脫開哂嗰一代,真係會唔知做緊乜的。

當有啲戲係需要家長陪同先可以入場睇嘅話,呢一套剛好相反:如果你自問唔係呢個年代嘅人,呢套戲,大概係需要由子女陪同入場的。

 

(標題為編輯所擬,原刊於作者 Facebook

發表意見