立場新聞 Stand News

【無營養文化系列.三】資本主義下瘋狂消費的陷阱

2018/10/21 — 11:20

電影《最愛女人購物狂》劇照

電影《最愛女人購物狂》劇照

開心買嘢、唔開心買嘢,呢個好似是香港人的定律 — 但是,點解是買嘢呢?

商家的陷阱

點解香港人咁鐘意買嘢?因為返工辛苦嘛,想獎勵下自己很正常。但我想問,是誰告訴你「買嘢就會開心」?其實咪又是商家。商家話你聽,用咗我的產品,就會變靚啲、滿足啲、開心啲㗎啦!

廣告

商家咁話你知,又何嘗唔是因為佢想賺你錢。而另一方面,買嘢的確是一種快速填補心靈需求的方式,因為佢令你實際上得到啲實物、或者用咗一啲服務,所以你個心一定是會感到踏實咗,好似被填滿咗咁(但已經有不少文章指出,購買的快樂最多讓你開心一日;一日之後,要點處理件物品呢個問題先麻煩呀)。

跌入萬劫不復的循環

廣告

更大的問題是,一旦我哋培養咗呢個「返工好辛苦呀買嘢獎勵自己」的 Self-Reward Mode,基本上可以講是萬劫不復,因為當你做嘢越辛苦、你就更想「買嘢獎勵自己」、結果買更多嘢。快樂在購物的過程中越來越難以滿足,養大咗個「胃口」的結果,是你必須要「做嘢更辛苦」,先至可以買到嗰啲你想買到嘅嘢。

然後,嗰啲嘢要搵地方擺先是大問題。越買越多的結果,係屋企變得越來越混亂,心情也隨之煩亂;但,煩亂又繼續透過購物去解決和滿足 — 咁你話,係咪萬劫不復?

難道大家不發覺嗎?從前讀中學,出街 15 蚊的權記雲吞麵都是午餐恩物;到讀大學、大家就唔想食 20 蚊頹飯了,可以的話,都是食 30 幾蚊的中價飯吧;到出嚟做嘢,無 4-50 蚊一個午餐都落唔到樓、番唔切工就不如搭次的士,又多咗啲無謂的使費。我唔是要求大家同意食劣食,但的確,15 蚊的權記雲吞麵仍然可以餵飽你(兼且仍然可以很好食),只不過是我們漸漸要求更高的生活水平罷了。

即食的快樂、刺激和滿足感

而事實上,當你每日返工放工好撚辛苦,9 點鐘放工嗰刻個腦完全 Function 唔到時,能夠得到一樣你想想哋要嘅嘢(姑勿論是啲咩都好),都會令你感到小小開心 — 呢種開心就好似食即食麵咁快,但同時就是食得嗰 15 分鐘,有咩營養可言?可以令你快樂幾耐?相比起令個人有思考的活動、與人交流同行,與身邊的親人、愛人和朋友有美好的相聚與溝通,試問邊種開心有價值啲?不過顯然地,由於這種快樂需要更多的時間、心機和精神投資,所以自然少啲人重視。如是者,大家只嚮往即食的、金錢堆砌的快樂,咁試問個社會邊度會有內涵可言?

回頭講番前言中 Opportunity Cost 的問題。當我們運用大量金錢、時間去處理「購物」(以及購物後點樣處理件物件)呢件事時,我們又放棄咗幾多 highest-valued option foregone?這,大概是生活在資本主義社會已久的我們,需要好好思考的問題。

發表意見