立場新聞 Stand News

技術文:Thanos計錯數?

2018/5/17 — 12:56

史兄:「硬係覺得呢個樣嘅Thanos好似一個人,但又講唔出係邊個。」(圖片來源:https://www.sideshowtoy.com/collectibles/marvel-thanos-hot-toys-903429)

史兄:「硬係覺得呢個樣嘅Thanos好似一個人,但又講唔出係邊個。」(圖片來源:https://www.sideshowtoy.com/collectibles/marvel-thanos-hot-toys-903429)

***本文含所有 Marvel 電影宇宙電影劇透***

細個無乜原因下成為美系超級英雄片嘅 Fans:第一套入戲院睇嘅英雄片係由積尼高遜演小丑嘅《蝙蝠俠》,之後多年嚟我睇咗好多好多英雄片。當中 Marvel Cinematic Universe/Marvel 電影宇宙嘅作品,只係冇睇黑豹,其他18套,每套都入戲院睇。

由 2008 年鋼鐵奇俠開始,Marvel 電影宇宙至今啱啱 10 年。呢篇文講下我對 Marvel 電影宇宙嘅睇法同感想(特別最近嗰套《無限之戰》),絕對無教育意義、無 take-away、無 lesson learnt,只有鳩吹。

廣告

*本文含所有 Marvel 電影宇宙電影劇透*
.
.
.
*本文含所有 Marvel 電影宇宙電影劇透*

《復仇者聯盟3 - 無限之戰》電影宣傳圖片

《復仇者聯盟3 - 無限之戰》電影宣傳圖片

廣告

1. 《復仇者聯盟-無限之戰》

呢套戲好睇。

當中我最最最欣賞,係劇本如何好合理、好順暢、不刻意咁令美國隊長同 Ironman 呢對其實無乜深仇大恨嘅襯家,唔會喺套戲碰頭。一碰頭兩個人就唔會合作,然而二人碰頭多數係因為要合力拯救世界。

對於套戲嘅主旨,其實如下:

《復仇者聯盟-無限之戰》,描述一個所謂右翼法西斯 (Thanos) 同一班左膠 (超級英雄) 之間嘅鬥爭。

你當 Thanos 係一個主張停止發出單程證畀大陸人嘅社運人士:佢知道香港資源有限偏偏人太多,政府又唔肯停止單程證,於是希望透過集齊六粒寶石(六個中南海高層嘅人頭?)呼喚神龍,無差別咁殲滅大陸同香港一半人。咁到時香港就有資源接收新人口。大概係咁-當然真正嘅法西斯,會要求神龍毀滅大陸人呢個人種。

戲中 Thanos 覺得宇宙太多人,資源太少,於是希望用神力隨機滅去一半人口。然後一班左膠超級英雄話 Thanos 殺人唔啱,要阻止佢-中途仲想搶佢隻手套-但冇畀任何解決方法去應付資源唔夠嘅問題。我唔知係佢哋覺得冇問題、定係有其他方法解決呢個問題,反正一聽到 Thanos 要殺一半人就發晒茅,要阻止 Thanos 作惡。

最搞笑係,明明班英雄殺一個自己友、一個半人半機械人(Vision/幻視)等同自動拯救半個宇宙,偏偏大聲一句「一條人命都係命」否決咗動議……點知轉頭去咗黑豹個場開拖,搞死人哋啲兄弟同族人。屌你,黑人啲命就唔係命?人哋嘅草原呀、樹呀、泥土呀,唔係地球一部份?你班粉腸有夠虛偽。更搞笑係,搞死晒人哋啲兄弟同族人後,咪又係要親手殺死幻視!你早啲殺人哋唔使死咁多人呀!畀啲堅持、出些少掙扎好唔好?

咁黑豹班人又唔抵幫。開個防護罩,人哋梗係繞去個罩嘅後面打你,點知你後面原來係要保護嗰個地方!嘩,你整防護罩嗰陣無諗過前面開罩,人哋會去攻你後面?啲咁簡單嘅道理,我以為有人會諗到。我屌!為咗解除後方威脅,佢哋熄咗個防護罩畀對方正面攻入嚟!係咪戇鳩嘅?呢一部份個編劇諗緊啲乜?

所以,考慮以上各點,Thanos 贏,其實大快人心嫁。

撇開黑豹呢幕明顯係為咗混戰群揪多 P 百人中出感謝祭而夾硬整出嚟,《復仇者聯盟-無限之戰》接近完美。Marvel 十年間拍咗 18 套超級英雄片,為咗係第 19 套《復仇者聯盟-無限之戰》。作為 Marvel 電影宇宙大結局第一集,呢套戲無令我失望。

───

2. Thanos 計錯數-政治盤算上

講返左膠對法西斯呢個比喻。我從中領悟到兩個道理:

道理(i):Thanos 最終會失敗(等 2019 年嗰套大結局下集啦),因為佢無一早提供安全港畀超級英雄 buy-in 佢哋。應該咁講,佢手套同寶石嘅能力係無差別咁殺一半人,唔可以揀邊啲人嚟殺,註定佢一定失敗。

如果佢可以揀人嚟殺,大可同班英雄坐埋枱傾:「嗱,我殺嗰一半人口唔包括地球人,唔包括超級英雄,仲有幾粒石頭用完會還翻畀你哋;你哋肯首,我做,唔肯,就殺死你哋再去做」。反正 Thanos 非常目標導向,佢亦無必要喺殺人之前浪費氣力殺其他人。又或者,如果班英雄爭取到呢個刁返嚟,真係「階段性勝利」-起碼自私無比嘅地球人一個都唔駛死;我估班有一半英雄會支持(Ironman 咁世界仔應該 OK、紅女巫為留住情郎都贊成、作為公務員嘅 Nick Fury……應該贊成),另一半反對(隊長係原則派、Thor 智力不高會堅持反對、Star Lord 如果知道愛人會死一定反枱),之後英雄再嚟內戰II,Thanos 大可坐收漁人之利。嘩,情境何奇熟面口?英雄一內鬨,Thanos 使唔使揀人嚟殺已經非常次要-前題係佢有能力揀,或者呃鳩啲英雄令佢哋以為 Thanos 可以揀。

唔識講大話,又不諳人性,乃 Thanos 失敗嘅原因。

道理(ii):Thanos 另一個問題係一開波講打講殺,想要無限之石問都唔問就去搶鳩人啲嘢,從來唔諗埋枱講數。每樣嘢都有個價,文明啲,用錢、畀利息,用戴耀庭教授主張嘅商議式民主,OK?

有篇網上流傳嘅文章講過,事件嘅先後次序好重要,當中一個例子大概如下:

做學生去做 PTGF,係貪慕虛榮;
做妓女去讀書,乃力求上進

無論理想有幾偉大崇高,總之先郁手就唔撚啱。套用 Thanos 身上,佢大可坐喺度等班友嚟搶佢啲石同手套,畀人迫到埋牆角,先奪取道德高地、拎咗光環,再作反擊。到時,佢會係正派,班英雄先係奸角。

───

3. Thanos 計錯數-算術上

上面千幾字擺明玩嘢,認真咁講,Thanos 呢個「隨機」滅一半人口計劃有冇問題?

有。好似標題所講,最大問題係計錯數。

佢嗰個「隨機」滅絕一半人口計劃,根本無助解決宇宙資源不足嘅問題。

假設宇宙有兩批人,一批不事生產,唔能夠養活自己嘅人(簡稱廢人),佔總人口比例中為 p;另一批能夠養活自己之餘(簡稱叻人),佔人口比例為 (1-p),仲能夠生產資源養活其他唔夠資源嘅人。另外:

-廢人又好、叻人又好,每人生存所需最低資源為 Y(每個人都一樣)
-叻人平均實際生產為 X,佢哋食咗 Y,淨低嘅 (X-Y) 用嚟供養啲廢人

成個宇宙計,資源係越嚟越多、定越嚟越少,就係視乎以下兩個數字嘅比較:

不事生產人士嘅整體要食幾多嘢:p*Y

Vs

能生產人士嘅整體食剩幾多嘢:(1-p)*(X-Y)

既然 Thanos 覺得宇宙支持唔到咁多人,即係廢人消耗嘅資源多於叻人儲低嘅資源,即係

p*Y>(1-p)*(X-Y)

(加返叻人食嘅嘢(1-p)*Y喺左邊同右邊,唔會影響結果;你乘返個宇宙總人口 “N”去個 p 度,亦唔會影響結果;當兩者嘅差額靠宇宙嘅資源庫存量搭夠數)

調左調右,四則運算

Y>(1-p)X

即每人生存所需最低資源 Y 大於 (1-p)X。

寫咗十幾行公式,趕走晒啲讀者,重點?留意下,Y>(1-p)X,呢個情況,並不受宇宙總人口 “N”影響,只受 Y, X 同 p(兩種人嘅人口比例)。即係:

如果 Thanos 嘅滅絕計劃為「隨機」,不單唔會影響到Y(每人生存所需最低資源)、X(叻人嘅平均實際生產),更仲要係連p (廢人同叻人之間之間嘅比例)都唔會受影響。

解讀:「隨機」係呢堆計算中非常重要:因為「隨機」,滅絕嗰一半人,會按比例分配喺廢人同叻人嗰邊,結果廢人同叻人之間嘅比例 (p) 唔會有改變。

如果開始之前,總人口 200,當中廢人 100 個、叻人 100 個,人口比 50%-50%。Thanos 計劃要滅 100 人,因為隨機,呢 100 個被滅嘅,將會為 50 個廢人、50 個叻人,於是乎最後總人口 100,當中廢人 50 個、叻人 50 個,兩種人嘅比例不變,依然 50%-50%。

即係話 Y>(1-p)X,依然無改變。

***喺呢個情況下,實行終極滅絕 50% 生物後,宇宙依然處於淨消耗嘅狀態。***

當然,人少咗,總資源嘅耗損會少咗,但 Thanos 咁辛苦做完咁多嘢,宇宙依然耗損緊。

如果你講緊根本宇宙生物 as a whole 係消耗緊宇宙既有嘅資源庫存, 當中有人貢獻正數、有人食緊宇宙老本,Thanos 要做嘅係消滅宇宙中食老本嘅人,而唔係用一個隨機嘅方法去殺人。上面簡單嘅代數話你字,隨機嘅減少,本質上宇宙生物仍然消耗宇宙嘅資源庫存,不同嘅係消耗速度慢咗。

(唔戴頭盔:如果上面啲數錯咗就算,死都唔會改)

有一個情況下,Thanos 呢個隨機滅絕計劃係啱嘅:

宇宙每年額外生產嘅資源,啱啱足夠宇宙人一半人口。

即係乜?你每年買股票所收嘅股息,足夠你每年支出。咁你可以靠股息生存,唔使賣股票嚟生活囉。因為唯有係咁,隨機消滅一半宇宙人嘅計劃先可行。

呢句正正係傳奇級經濟學家費沙 (Stanley Fisher) 有關收入與財富嘅名言:

Income is the potential consumption without trenching on wealth.

收入,係唔郁到財富下最大嘅消費。喺呢個情況下,每年產出等於消費,宇宙唔會少、亦唔會有多餘嘅資源養任何新嘅生物。(如果你信某啲 theory,減咗一半人口,it’s only a matter of time where the population goes back to the original level。即,Thanos 嗰方法只暫時解決到問題。)

我喺電影度無從得知呢個宇宙每年會唔會生股息。如果冇股息,宇宙嘅資源庫存只係有少無多,Thanos 呢個「隨機」滅去一半人口宇宙資源夠分,實為拖字訣,絕對無助解決佢口中嘅問題。佢要做嘅係要滅絕所有不事生產、對世界冇貢獻嘅宇宙生物-無法揀取個別人士 / 群體嚟消滅,正正係 Thanos 無法成功嘅原因。一提起拖字訣,我想像 Thanos 其實係民選議員嚟,講一個好似解決方法,諗真啲係得個拖字。

都好,作為政治家,Thanos 有提供些少解決方法,唔會學楊岳橋咁話要打硬仗,然後去咗紐約食大餐仲貼上 IG。弱智。

你對佢無希望,但佢依然會令你失望嘅泛民議員

───

4. 劇情公式

外國應該有人寫過(無時間睇或者抄人哋文章),但 Marvel 電影宇宙,劇情有極強嘅普遍性,普遍到幾乎成為公式:

-主角多數要幽默風趣,起碼身邊要有一個咁嘅大配角。

《Ironman》, 《Guardian of the Galaxy》, 《Antman》, 《Spiderman》 — 主角滑稽幽默風趣; 《Thor》 (Loki), 《Doctor Strange》 (Wong)-大配角。Exception –《Captain America》系列。

-電影開頭十分鐘,一定要有一場打鬥作為序幕。幾乎沒有例外,尤其近年嗰十套八套。
-最終波士係意想不到 / 如果一早知道個係波士,則要靠外力擊敗波士嘅手法,絕對唔會靠主角的武力打擊對方

最終波士係意想不到-《Ironman 3》、《英雄內戰》、《Guardian 2》

如果一早知道個係波士,則要靠外力擊敗波士嘅手法,絕對唔會靠主角的武力打擊對方-《Guardian of the Galaxy》(靠其中一粒 Infinity Stone)、《雷神3》(其他波士)、《Ant-Man》(Thomas 火車)、《Dr Strange》(仙履奇緣/伊邪拿美)、《美隊I》(其中一粒 Infinity Stone)、《Ironman 2》(War Machine 合力夾死佢)

仲有一種情況,就係波士係英雄,咁會留對方一命-《Winter Solider》, 《Avengers 1》、《Civil War》、《雷神I》

當中以一早知道個係波士,靠外力擊敗波士嘅手法玩得最多,亦最出神入化。

-所有戲只為鋪排 Infinity War,after credit 先係全戲重點
-你知道主角英雄一定唔會死;死,都係假死。真死嘅,並唔係因為劇情要佢死,而係因為片約同片酬令佢死。

Loki 死係因為 Tom Hiddleston 太貴……仲有邊個主角英雄死咗?Avenger avenge 啲乜?第一集嘅 Phil Coulson 無死、第二集嘅 Quicksilver 係同 Ultron 開戰後先死、第三集嘅 Thanos……根本無人死。

你一發現咗呢套公式,Marvel 嘅戲變得好悶。呢套公式係喺戲院睇《英雄內戰》嗰陣發現,搵資料確認大概地啱;之後睇《蜘蛛俠》同《奇異博士》中途睇到瞓著咁滯,近排索性放棄埋《黑豹》。

搞下搞下,Marvel Cinematic Universe 嘅戲拍到變《真情》咁滯。10 年間呢 19 套戲去得太盡,嚟緊 Disney/Marvel/Fox 要諗嘅係,除咗不斷加入其他英雄人物(迪士尼買 Fox 都係貪佢 X Men 同 Fantastic Four 渣),喺劇情上如何再有突破。其中一個突破,估計為做咗好多年嘅演員會堅死-死即係嗰個演員(留意,係該演員,唔係佢演嗰個角色)唔會再喺 Marvel Cinematic Universe 作為恒常演員。

睇下集,OK?

───

5. 心目中 19 套戲嘅高低

以下係我對 Marvel 電影宇宙 19 套電影嘅排名。排名頭三位同尾三位就夠,老實講中間嗰堆分別真係唔大。

最佳
第一:《英雄內戰》

超級好睇,大幅拋棄第二名。

當時電影上影,我頭兩日睇咗兩次。

《英雄內戰》將 Marvel 電影宇宙嘅公式發揮得最極致嘅代表作:開頭五分鐘喺尼日利亞整場打鬥醒一醒神;中途幾場打鬥,劇本出人意表地發展;最後出現意外嘅「敵人」-你一直以為最後大佬係齊莫 (Baron Zemo) 所釋放嘅幾個 Winter Solider,點知 Ironman 先係。

19 套 Marvel 電影宇宙中,《英雄內戰》劇本分數最高,節奏、邏輯完全無重大瑕疵。套戲嘅缺點反而係特技:德國機場打嗰幕太差,背景唔識郁,綠幕得太膠。細節上,隊長同巴基喺機場先出發去西伯利亞,Ironman 遲好多出發但最終只係遲些少到達,徹底體現有錢人同資本主義嘅偉大。

我前後睇咗五次《英雄內戰》(兩次喺戲院,喺 iTune 睇咗三次)。英雄片之中,只有 Nolan 套《黑夜之神》(The Dark Knight) 睇嘅次數更多(約廿次)。

第二:《鋼鐵奇俠I》

當年毫無期望,但好有驚喜。不論係 Robert Downey 嘅演出,定係劇情鋪排,喺十年前帶畀觀眾好多驚喜。點知以後佢套套都係咁拍……

第三:《復仇者聯盟-無限之戰》

雖然上面咁多找碴,整體嚟講《復仇者聯盟-無限之戰》堅好睇。抱住極高期望入場,依然無失望,淨係呢樣嘢已經足夠入頭三名。各英雄嘅位置角色戲份,分配得非常好(除咗 Star Lord)。劇情亦見突破,暫時唯一一套由敵人暫時勝利嘅電影。

用咗兩次「暫時」,係因為 Thanos 贏得太盡,英雄嗰邊死嘅人太多太多,多到你覺得一定會翻盤。你信唔信主演咗一套戲、客串咗兩套嘅 Tom Holland 就咁瓜柴?人頭搏芋頭呀師兄。

最差:《雷神2-黑暗世界》
第二差:《復仇者聯盟1》
第三差:《鋼鐡奇俠II》

總之劇本鳩流流:《雷神》系列普遍差,因為神仙唔會死、打鬥亦似龍珠咁轟轟轟唔好睇(點解 DC 嘅超人同正義聯盟仆晒街未?《神奇女俠》結局打鬥亦係全片最差嗰幕),當中《雷神 2》劇本軟弱無力,睇完出門口即刻唔記得講乜;《復仇者聯盟 1》嗰啲泥鰍嘅造型非常嘔心;《鋼鐵奇俠 II》雙人夾擊結局喺戲院屌咗出聲。

其實《復 2》個故事亦低能無比:鋼鐵奇俠想用 AI 嚟打擊同預防罪案以保護世界,但對上一年嘅《美國隊長 2》,劇情咪一撚樣(又係用 AI 嚟消滅九頭蛇嘅人)。

唔好奇怪篇文點解會喺度完結,因為,真係純粹鳩吹。以上嘅嘢,我諗咗好一陣子,學網友 深霧 話齋,再唔寫,就寫不出來了……

 

原刊於史兄 Medium

史兄Facebook page
IG (主要用嚟睇女仔) 

發表意見