立場新聞 Stand News

你覺得自己怕唔怕輸?

2017/11/9 — 19:09

資料圖片

資料圖片

你覺得自己怕唔怕輸?

阿仔慢慢長大,我發現佢越嚟越有呢個傾向。大人話,怕輸嘅,就努力啲去練習同準備,咁咪冇咁易輸囉。但細路仔避免鬥輸嘅方法係,盡量避免出賽。場都唔出,咁咪唔會輸囉。

驚輸嘅原因,首先係覺得自己真係會輸俾人,歸根究底係一個自信心不足嘅問題。自信唔夠呢個弱點,我細個果陣都好嚴重。冇自信嘅原因有好多,我到好大個睇返轉頭,先隱約捉摸到少少當日問題嘅端倪。老實講,父母對子女嘅態度當然很有影響,但同時間,自信心係個好L深層次嘅問題,斷唔係阿爸阿媽努力鼓勵,天天為孩子吶喊助威就可以解決得到嘅事情。

廣告

「唔出賽就唔會輸」呢個邏輯,除咗係驚死怕衰冇自信之外,當中隱含更大嘅意義係「利益計算」。反正冇贏嘅機會,咁我連行出嚟打都費事了。正因為有呢種計算響人嘅心裡面,所以那些「熱血」同「正義」嘅激勵說話,對有些人…那管係大人同細路,都係完全冇效。I cannot guarantee a win but I will promise a fight,Nike早排呢句slogan我自己其實好鍾意,但對現實型嘅人,我諗完全冇激勵作用。當你覺得毫冇勝算,仲fight?前世未俾人𢱕7過麼?

冇自信加上現實,這個「組合」我覺得係最難搞。冇自信嘅真正壞處,係影響一個人對每一場「比賽」勝算嘅判斷。明明係五五波,你卻覺得係二八。另一場係三七波,你就覺得直頭係零十。如果你份人淨係自卑,但唔係好現實,即使覺得輸梗但輸都仲要腰板挺直嗰隻人,咁都還好,你還是會全力出賽,那場你以為係零十,但實際上係三七嘅比賽,你都仲係有啲機會會贏。之但係又自卑又現實嗰批,誤判一場比賽係零十…零十喎你老闆,直接投降算啦。

廣告

自信心這方面,以一個男孩子嚟計,我相信係要透過好多自身嘅磨練同經歷先可以改變得到,其實最後都係睇緣份,強求唔嚟。反而「現實」這一方面,可能可以調教一下。首先有關勝算嘅概念:零同埋「唔係零」,響值搏與否其實係有好大分別的。假如面前的比賽,係要我同當fit嘅飛人保特跑一百米,咁我勝算應該就算唔係零,都係接近零啦。但又如果,我係一隊非聯賽嘅球隊,足總杯抽中下場要對曼聯,勝算肯定係好低架啦,但另一方面,勝算亦肯定唔係零。足球比賽嘅性質,相比起百米短跑嘅變數係多好多。戰術、排陣、鬥心…好多好多嘅factor都對賽果有好大嘅影響。爆冷當然唔容易,但肯定冇人敢話係冇可能。人生要面對嘅事情普遍性質複雜,情況係接近一場足球比賽遠多於一場百米短跑。但問題係,身邊總係有人不斷提醒你,你人生嘅比賽係一場短跑而唔係一場球賽,而保特就係你嘅對手,所以,你都係投降算把啦。

寫得太長氣了。對於阿仔嘅問題,我最近還在努力跟他灌輸一些有關球賽嘅概念,盡量教佢一些有關足球嘅知識,希望佢長大多一啲嘅時候,會慢慢理解箇中嘅意思。

然而,「零」與「唔係零」嘅體會,人生固然如是,總覺得,有關這個城市的許多事情,其實也是如此。

 

作者 facebook

發表意見