立場新聞 Stand News

你有幾耐未試過,不問結果仍願意出盡力去完成一件事情?

2018/7/18 — 15:38

圖片來源:FIFA World Cup Facebook

圖片來源:FIFA World Cup Facebook

世界杯決賽,法國對克羅地亞。阿仔同我一齊坐喺電視前面睇直播。

「老豆,你想邊隊贏呀?」阿仔問。

「我希望克羅地亞贏呀。」我說。呢場波,法國大熱,克羅地亞係 underdog,中立球迷鋤強扶弱嘅心態好正常吖。又加埋,之前咁多場,場場打足百二分鐘,表現落力鬥志頑強,嗰種意志係好值得欣賞嘅。

廣告

不過,荷包係好誠實。開波前我還是唔爭氣地小注買咗法國。

「咁法國勁啲還是克羅地亞勁啲呀老豆?」咁講實力就法國高啲嘅。「係呀?咁點解你唔幫勁啲嗰隊嘅?」人哋都咁勁啦,仲使乜你幫呀?「係咩,但係我啲同學鐘意幫勁啲嗰隊㗎喎。」呢啲咪勝利球迷囉,贏嗰隊幫嗰隊,冇 class 㗎,你咪學添呀…「知道啦,老豆。係咪咁所以你鍾意阿仙奴?」errr…你其實係咪串緊我呀。

廣告

仔,有時就算唔夠人勁,就算最後輸咗,都係值得支持㗎喎。「吓?點解呀?」老豆我呢,以前喺外國讀書嗰陣都有去打比賽㗎喎。嗰陣呢,我同你都識嗰幾個 uncle 一隊㗎,去打嗰啲 local 小聯賽,好開心㗎喎。

「你哋好勁㗎?」梗係唔係啦,班鬼仔大隻過我哋咁多,不過都 ok 嘅,中游份子囉。不過畢業嗰年,我哋聯賽打完之後,有個 playoff 嘅,我哋唔知發咩神經,贏吓一場贏吓又一場,最後去到四強喎。不過四強嗰陣,抽到對隊超哂班嘅。佢哋係高我哋一個級別嘅聯賽冠軍,仲要成個 season 未輸過。我哋一睇,知道大鑊啦,實力差距分分鐘遠過曼城同傑志…點砌呀心諗。

「咁最後點呀?」阿仔問。

唔知點解呢,大概係因為後生啩,面對前面一場覺得必輸無疑嘅比賽,一班隊友都依然係鬥志高昂。唔知係咪知道,呢場波之後,呢隊波就會散㗎啦,畢業嘅畢業,返香港搵工嘅搵工,讀書嘅快樂日子,去到場波吹雞完場嘅一刻就會完結。所以呢場波,無論輸贏,搏盡無悔。

吖頂,幾 x 熱血呀。

場波…最後我哋輸咗 8 比 1。你老豆我入咗破蛋嗰球。完場嘅時候,我哋好似贏咗冠軍咁,仲同埋對面嗰隊唱哂歌慶祝。嗰個畫面,係我人生裡面其中一個好重要嘅記憶。人到中年,總係懷念年輕嘅時候嗰種情懷同熱血。明知會輸,明知努力都費只係徒勞無功,但你仍然會義無反顧地去出盡力去搏到最後一刻。到比賽完結,嗰種「雖然輸咗但你覺得對得起自己」嘅感覺,其實係好滿足的。

「唓…我仲以為你哋贏咗添。」阿仔顯然對我呢個故仔一啲感受都冇。

我好希望阿仔會愛上踢波。球場對男孩子嚟講,從來都係學做人嘅課室,與及充滿回憶嘅場景。人生好多重要嘅感受,第一次嘅體驗地都係喺球場。人到中年,越嚟越懷念從前球場上嘅自己。相比以前,你其實有幾耐未試過,不問結果仍願意出盡力去完成一件事情?還有現在嗰種「即使贏咗但仍覺得對不起自己」嘅感覺,反差也真夠大。

克羅地亞最後都係輸咗俾法國,現實最後都係歸現實,不過,又如何?

年輕真好。

 

#踢過波的中佬都應該會明白吧
#我不怕千萬人阻擋只怕自己投降

(標題為編輯所擬,原刊於作者 Facebook

發表意見