立場新聞 Stand News

一句激嬲產後婦 ─ 《BB來了》

2018/7/18 — 16:51

《BB來了》片段截圖

《BB來了》片段截圖

無綫劇集《BB來了》開播以後,一直成為媽媽們熱話。好多媽媽或媽媽專頁紛紛開post讚賞劇集引發的共鳴。同時亦見有人抨擊劇情誇張,甚至挑剔港媽們由朝到晚只覺自己偉大就大哂的心態。無意似上兩輯「一句激嬲」鬧人,更旨在的,是想要剖析港媽們的心態,求你給我們一點諒解。以下綜合了劇集內,以及劇集引發的一些針對女人當媽的言論:
.
1) 你有無搞錯,宜家事業搏殺期你走去生仔?
.
你係咪真係要迫一個阿媽去答你:「我都唔想生仔架,我都唔想要架。」如此沒良心的說話?為何要把事業與生仔放在一個對立面上?懷孕本應是開心事,沒錯,那可能代表著員工會有數個月不能在崗位服務,但這是一個絕對自然絕對合法的過程,為何要迫使打工仔們在事業與家庭之間二擇其一?這是一個健康的社會應有的觀念嗎?掉返轉,女士們,新西蘭總理 Jacinda Ardern 去年十月上任,今年六月生仔。一星期後,在自己家中的沙發上,呢頭餵完人奶嗰頭攬住BB FACEBOOK LIVE,就著她力推的50億新西蘭元家庭福利方案講話;加拿大、澳洲都曾有女議員湊住B開會,甚至餵母乳。邊個話事業家庭不能兩得意?全球各地的女人都正以行動,抗衡社會對媽媽、對女人生B的歧視。你同我都可以,只要大家夠勇敢去證明自己,不甘於被傳統以至扭曲的觀念所框死。再者,BB來了是緣份,與其打一個完全唔識珍惜你嘅老細嘅工,不如放心思與珍惜只有你才能擁有的人與事。
.
2) 你係咪大肚時做咗XXX,所以順產唔到/BB有濕疹……(下刪一萬個可能)
.
咁你係咪做得陰質事多,個良心已經被狗吠咗?你自己無常識都算,仲要拎住啲歪理黎鬧我,你無野啊嘛?學李佳芯話齋,女人係all in了樣貌、身材、事業來經營生仔呢個project。於是努力戒口、運動、食supplement……就是為了迎合社會覺得一個媽媽應盡的責任。「順產對BB好啲喎……」、「連無痛都唔諗住打唔想影響BB……」、「餵人奶阿B無咁易濕疹啊……」真係坊間有幾多條方,都盡力跟足。然後好似我咁,分娩時真係開唔夠度數要緊急剖腹,就係代表著你all in所有野後嘔心瀝血經營個project,到present前就話,「噢你唔使present了」那樣。會唔會其實係我最傷心?係我作為新手媽媽最無奈最徬惶?點解仲要怪責我?做人俾多少少同理心吧,與其搵個原因,不如幫手搵個解決辦法吧。
.
3) 宜家個孫我都有份,點解唔俾我帶俾朋友見?
.
正如上述所講,個project係我辛辛苦苦經營,你完全不理會我的意願,就攞個project去領功、攞彩,咁算點?唔係話同佢地斤斤計較,但就算你係長輩,都應該尊重爸爸媽媽們吧。佢地新手上路,可能已經有好多野煩、好攰,可能佢地會怕BB一出世咩針都未打,見咁多人好易感染惡菌。真啊,BB病咗,係爸爸媽媽照顧;BB見完好多陌生人後生理時鐘發咗癲,都係爸爸媽媽受返。彩可以攞,等到爸媽們ready先囉。協調與互相體諒才是道理啊。如果想你個仔女好,想你個孫好,體諒比一切補品更為重要。
.
4) 爸爸:「唔係淨係得你辛苦架,我都好辛苦架」
.
某程度上,我同意爸爸們會有這個感覺。我望著老公要撐起頭家,早出晚歸搵錢工作來照顧我同BB,我都會體諒佢,有時甚至因此攰到死,都自己湊返BB,廢事佢辛苦工作完返來又要面對對住BB喊的無助。但真係,好易激嬲女人嘅呢句,尤其是啱啱生完的一群。你要明白,太太是剛剛完成重大手術和身體變化,她是要挺著仍在復元的身體,忍痛餵人奶、照顧BB。然後心理上,一來有荷爾蒙作崇,二來如之前所講,她all in了所有東西卻換來「唔識餵人奶」、「BB係咪唔飽啊」、「BB無屎痾」等等問題帶來的無助與無力感,不論體力與情緒上,係真係好辛苦,還未計其實仍未消化懷胎那十個月的提心吊膽呢?就忍一忍吧,不要硬碰硬,好好溝通吧。女人們,亦真的要體諒啊,有時隊友愛錫你,又不懂怎樣幫你,其實他也很痛苦的。
.
5) 媽媽 group 係圍爐取暖
.
好笑喇,根本世界就係靠圍爐取暖運作架啦,如果唔係,一班金融佬就唔使搞咩兄弟會互相幫助,一班兄弟幫就唔使搞咩睇波打機之夜,一班中女就唔使搞咩通宵麻雀王大賽啦!物以類聚是人類,特別是香港社會的一個特點啊,你唔係宜家先發現下話?有人覺得媽媽們係自 HIGH,成班女無啲建樹。唔呃大家,我以前都有咁諗過,但當我生咗小朋友後便改觀了。話說有次我塞奶發燒,陪月放假、奶奶自己阿媽未遇過、老公唔識搞、公假難約醫生,但真係辛苦到自己不停喊,結果就是上媽媽 group 問各位媽媽,才短時間內解決了塞奶問題。係唔係要個徬惶嘅新手阿媽孤立無援至死先夠清高?我亦曾經見過有小產的女士上這些媽媽 group 訴苦,不停自責,甚至怕告訴老公這個噩耗。我不停追那個 post,某程度上是靠一班媽媽開解與力挺,她才能有膽量面對一切。只有有過 BB 嘅女人才能徹徹底底明白當中的快樂與辛酸,而間中自 high下,有咩問題?你返工好憎個上司,都會好期待同同事一齊講佢壞話鬧臭佢啦。人之所情架咋。又係同理心嘅問題。
.
6) 全職媽媽好偉大?我覺得偉大係用黎形容孫中山
.
這是邏輯謬誤,一個人偉大,不代表另一個人不能被形容為偉大。我不會說服你去認同媽媽偉大,我甚至認為常常恃住自己偉大而情緒勒索子女的媽媽,是極有問題。只不過,生仔是兩個人的事,男同女一同製造 BB,但就只有女人需要經歷生產。雖然女人好努力 fight back 社會上對媽媽的枷鎖,但事實就是大肚始終有影響到一個女人嘅人生。例如本來有得去外國 training,就算老闆對妳好,妳都不得不要稍為放緩事業上的發展,過多幾年後再算。全職阿媽就算事業心仍在,在家努力 freelance,也會因為阿女阿仔的呼喚而不停分心,甚至覺得自己在家卻不能分太多時間給子女是罪過。還未計要做家務呢?就算稱不上偉大,也值得你尊重吧。這樣的一句評價,只顯示閣下心胸之狹隘。
.
世界對女人有太多枷鎖,可以改變這個局面的人,就只有女人自己。排除一切閒言閒語,努力做好全職媽媽或在職媽媽,就是最好證明自己的方法。而如果這個世界,人與人之間有多點體諒,多點站在對方角度思考,相信才是對大局最好的方法。做阿爸定做阿媽,做阿嫲定做阿婆,講到尾咪又係想 BB 好!

 

原刊於作者 facebook 專頁

廣告
廣告

發表意見