立場新聞 Stand News

不如索性禁咗螢光棒

2018/9/26 — 19:48

近幾年,每逢中秋,都好多 post 呼籲人唔好玩螢光棒,講螢光棒對環境有莫大傷害。

螢光棒唔係咩必需品,而且有很多代替品,對環境有咁大害處,當然唔應該再玩。但係,就好似山竹襲港翌日,你政府唔帶頭或想辦法叫停工,只係叫人自願互諒互讓、叫僱主體恤員工唔好扣錢扣假,根本係離地甚至係傻嘅。人就係本性自私,大部分僱主當然唔想蝕錢,有好多人會自私到變成無良僱主。同樣道理,我覺得你年年呼籲叫人唔好玩,都係於事無補,人就係自私嘛,自身感覺唔到有害,大部分人係唔會理你嘅呼籲。即係好似凱旋門、翔龍灣居民呻大陸人影響佢哋生活質素一樣,呢啲事喺香港發生咗幾多年呀?十幾年啦,香港人鬧過反抗過,去到心灰意冷,你依家先嚟「感覺到」,唔係遲鈍,只係針唔拮到肉唔覺得痛。

所以,年年中秋仍然有好多人玩螢光棒,你呼籲多十年都唔會減少幾多,除非有一日人人呼吸飲水都會中螢光棒毒。如果係咁,點解唔索性立法禁止咗呢樣嘢?自由?商人利益?問題係,呢樣嘢根本唔係必需品,又有代替品,純玩樂性質冇咩實質用途,一年玩嗰一兩次,但每次製造好多垃圾,嚴重污染環境,點解唔索性禁咗佢?

廣告

煲蠟可以禁,煙花也可以禁,連屬廉價日用品嘅鎢絲燈膽亦已唔准入口,螢光棒根本對我們日常生活毫無影響,就不如索性禁咗去。

 

廣告

(標題為編輯所擬,原刊於作者 Facebook

發表意見