立場新聞 Stand News

本土設計師做嘅 Gay Pride Sticker 香港 LINE 話唔出得街?

2017/6/13 — 13:08

上年年頭,WhatsApp update 咗啲 LGBTQ 主題嘅 emoji 震撼十億用戶;最近 Facebook 又趁 Pride Month(同志驕傲月)整咗隻「彩虹」 reaction;但用緊 LINE 嘅你又知唔知,最近有隻香港製造嘅 LGBTQ sticker 俾 LINE ban 咗呢?

我都係早幾日睇「溫嘉寶 WANKAPO」個 facebook page 講先知,話佢 submit 咗一啲 sticker design 俾 LINE,但 LINE 話「只係可以係指定25個地區發售(唔包括香港)」,原因係「文化背景有衝突」。

廣告

香港設計香港唔用得,有咩咁大衝突呀?溫嘉寶當然問到篤啦,LINE 再覆仲貼埋張「出事」嘅圖出嚟,叫個 designer 改。睇過~兩個馬頭,一個著粉紅、一個著粉藍色西裝,手撓住手,背景寫住 LOVE~有咩問題?我真係睇唔出有咩問題!

喂!通街都有人撓手啦~女女撓手,你會話人哋好好姊妹;男男撓手,你就話人 HEHE,同性戀唔要得?乜你咁 double standard 㗎!更何況,兩個馬頭只係著西裝啫,一定係兩個男人㗎嗱?

廣告

咩鬼嘢「文化背景有衝突」,你咁講法我就真係衝突喇!係,同性婚姻喺香港未合法,但都唔係抗拒到咁呀下話?唔 search 唔知,LINE 喺上年年尾,應印尼政府要求將一套「Enjoy Gay Life」嘅 sticker 下架。而家香港係咪好似印尼咁,主流宗教係穆斯林先?唔係吖嘛!定係收到明光社投訴呀?有又唔怕講喎,咁我反而無咁大衝突囉!

究竟係邊個嘅錯?Line 定係「有關方面」嘅錯?我唔知,我真係唔知,但很肯定唔係同性戀有錯!

(圖片來源:溫嘉寶 WANKAPO facebook)

(圖片來源:溫嘉寶 WANKAPO facebook)

發表意見