立場新聞 Stand News

必然的大佬

2018/9/28 — 19:15

波蘭的獨立工會「團結」(Solidarność)

波蘭的獨立工會「團結」(Solidarność)

【文:煙士打淫】

話說每個小國都要依附大國生存,簡單啲嚟講,即係要跟大佬搵食。有啲大佬真係好講雷氣,有福同享就有難同當,但有啲害咗你都唔知。

舊有美蘇掏荷包磅水俾東西歐國家,如今有中國政府推出一帶一路,同樣係招兵買馬嘅手段。邊個有錢,邊個就係米飯班主,係大佬。

廣告

呢種外交手段並唔陌生,早喺一戰之前,極端民族主義抬頭,塞爾維亞以斯拉夫民族立國(講起佢完全聯想唔到任何嘢?因為佢係個好廢嘅國家!),渴望可以擴張自己、食人哋啲地,尤其是土耳其(佢殘忍統治好多斯拉夫人!)呢個野心勃勃嘅小國本來都有姿勢冇實際,可惜佢有個大佬撐腰:俄國。俄國又係有堆斯拉夫人喺入面,基於同民族同宗教同語言同文化血濃於水 whatsoever 嘅原因,俄國係必然要撐塞爾維亞嘅!

咁啱得咁橋,塞爾維亞嘅死對頭:奧匈,又係有一位大佬喺背後,可惜佢嘅大佬唔係俄國、而係德國。德奧兩個雖然話就話係大佬同跟班,實際上 friend 過打 band,齊齊入侵支那割地,正宗係一條底褲兩份著、一個窿……啊唔係,係一個中國兩份食!

廣告

大家或者都聽過世界大戰爆發,原來係因為一件無鬼聊嘅暗殺事件。話說奧匈有個傻更更嘅王儲,又要揀喺塞爾維亞國慶個日出訪塞拉耶佛。塞打耶佛雖然唔喺塞爾維亞境內,但係唔知點解塞爾維亞啲黑社會又會走咗過去嗰頭……仲打死咗奧匈個王儲呀該煨囉,斐迪南幾廢都好,佢都係王室後繼者嚟㗎嘛,家下客死他鄉,你話幾難睇,幾難睇……

奧匈條氣非常唔 gur,日日打開報紙都見到佢鬧塞爾維亞殺咗佢個王儲……最後奧匈親自跑去德國搵人幫拖。德國當時火氣重,二話不說就拍哂心口,話會無條件支持奧匈。點樣無條件法先?咪就係開張空頭支票俾你(the blank cheque)、任得你填囉!

奧匈個大佬簡直錫到佢燶,但塞爾維亞個大佬都唔弱。其實塞爾維亞日日俾人問候媽媽嗰陣,已經一早搵咗俄國,俄國都答應佢會給予支持。奧匈話要打塞爾維亞嗰陣,俄國都第一時間調兵(你知俄羅斯幾大㗎喇),真係夠哂義氣!

國際大舞台再次洗牌,無論一戰之前定冷戰爆發,「大佬」呢個神秘又超然嘅地位一直存在。

話說波蘭本來係共產國家,但到咗 80 年代,人民開始抗爭,在列寧造船廠發起罷工,獨立工會「團結」(Solidarność)因而誕生。佢搞搞震無幫襯,抗議物價過高、又爭取工人權益,最後仲膽粗粗咁要求政治同經濟改革(即係叫共產黨收皮啫……)

波蘭政府出名懦弱,面對咁嘅混亂固然手忙腳亂、唔知點做好,於是讓步、Solidarność 成為第一個獲准喺蘇維埃國家存在嘅獨立工會。你都咪話唔巴閉!

但係之所以話我哋係要返返去篇文嘅主題:大佬。波蘭對上有個巴之閉嘅大佬:就係蘇聯。二戰之後爆發冷戰,東歐同西歐國家都變哂做跟班,睇美蘇兩個龍頭做人。

今次波蘭爆單咁嘅嘢出嚟,丟盡大佬嘅架子。蘇聯嘅布里茲尼夫於是恐嚇佢:你再唔控制個情況,我派人揸住支槍入嚟你哋度㗎!

波蘭政府聽完嚇到鼻哥窿都無肉,即刻做嘢,搭哂啲搞搞震無幫襯嘅異見人士返差館、又消滅咗 Solidarność 。掂喇!今次係做到嘢!

不過,無論政府幾咁懦弱、幾咁病夫,波蘭人民始終堅強不屈。1988 年波蘭爆發全國大罷工,群情洶湧,政府想㩒都㩒唔住。1989 年 Solidarność 喺大選贏得大多數議席,共產政權正式倒台。

從歷史可見,大佬得三兩個,其他小國弱國只可以做跟班,大佬錫你當然有著數、但大佬唔愛你、就係搵你笨。

香港喺國際關係上其實唔難發現大家唔使講都知心照啦有個大佬,無論你幾唔願意承認、佢真係我哋大大佬嚟,小至高鐵大至政改,佢都要插手。

係唔係同民族同宗教同語言同文化血濃於水 whatsoever 就真係見仁見智喇,不過呢位大佬,係比著數你定搵你笨,又係一個心照嘅答案。

發表意見