立場新聞 Stand News

香港冇地供應的真正原因

2017/8/27 — 11:07

圖片來源:香港城市大學網站

圖片來源:香港城市大學網站

香港樓價高已係不爭事實,至於點解咁高?無他,求過於供啫,點樣解決?不外乎壓需求,增供應,壓需求嘅招數幾已盡出,增供應係唯一出路,但點樣增加供應?

前幾天去聽一個增加土地研討會,講者有前規劃署長、前立法會議員、還有乜乜團體主席或代表,佢哋所謂建議,來來去去都係嗰幾點,就係叫政府填海、轉農地為住宅、開發郊野公園、公私合營、增加市區地積比率、活化工廈、加快建屋審批程序等等。

除咗增加市區地積比率外,基本上我都同意佢地建議,但所謂靈丹妙藥,你估政府冇諗過度過咩,班講者所謂真知灼見,其實你同我都諗到,問題係執唔執行到嘛!

廣告

講真,班講者應該探討嘅問題,唔係教政府應該點做,而係問點解政府冇咁做,或者應該係話點解政府做唔到;作為民間智囊嘅佢哋,關鍵係點幫政府或提供建議去針對核心問題。

點解政府做唔到,其實都唔係好難理解,兩個字就足以講清楚,係乜,咪就係「政治」。市場上有咁多有心人去做事阻難政府,填海話破壞海港、探討開發郊野公園話吋土不讓、轉農地又話破壞綠化、搬啲新界租霸走又話強搶民地、公私合營又話官商勾結,喺咁環境下,你話政府點郁?

廣告

土地資源就係咁多,呢樣話唔得,嗰樣話唔得,當然說穿了是有心人故意要阻撓,以達到某啲政治目的。第二樣唔講,好多幅政府計劃推出招標的土地,原已具備發展條件,竟然被人無端端走去司法覆核,令到建屋發展受到嚴重拖延,居心叵測。

所以話,供應匱乏又豈是土地不足問題,根源係「政治」問題,要增加土地,非不為也,實不能也。

發表意見