立場新聞 Stand News

香港住房問題(一)

2018/10/2 — 17:52

香港樓價持續高企 l t!m @ flickr —Attribution-ShareAlike 2.0 Generic (CC BY-SA 2.0)

香港樓價持續高企 l t!m @ flickr —Attribution-ShareAlike 2.0 Generic (CC BY-SA 2.0)

玩得「貼地風管」就大膽啲,分析「住房」這貼地問題,因為覺得現時好多意見都係「講啲唔講啲」,很多方案都是「斬件式」而非「通盤考慮」,難以認真討論問題。尤其頂唔順政府,完全漠視「時間」的重要性。招唔怕舊,政府繼續玩專家上身扮勁,用鉅細無遺但超慢的方式研究問題,然後提出一個十年都完成唔到的方案,等你救就真係死硬!

現在嘅情況就好似條街有好多人畀人斬緊,身中多刀,要馬上輸血。醫生就約齊街坊,研究下啲傷者總共需要幾多包血同埋邊位善心人願意捐血。醫生話要來個大辯論,看看到底邊位應該捐、捐幾多,承諾只要大家有共識,唔使三幾日,如果佢哋未死的話,就會有血到,請傷者暫時搵塊膠布頂住先。結果啲人死 Q 哂,醫生到時話終於做到血液供求平衡,政策成功!

處理「危在旦夕」嘅問題,要盡快決定對策,然後「搏老命」去做,無可能等到個個都 happy!要搵啱對策,首先要搞清楚一個最根本的問題:基層住房困難到底是「經濟問題」還是「社會資源再分配問題」?

廣告

我認為答案肯定是後者。以此為起點,我提出一個走五步的分析框架:

(一)識別局限條件:住房問題是一個宏觀問題,處理宏觀問題,首先要識別有那些無法扭轉的局限存在。而任何建議,若要可行,就一定要在這些局限內運作。

廣告

(二)風險評估:解決任何問題都要付出代價。願意付多少,就要看住房問題可能導致的最壞情況可以有幾「大鑊」。要各界充分了解相關風險後,才能就「應付多少代價」達成共識。

(三)制定「務實」的政策目標:「務實」就是要具體講清楚「什麼時間」做到那些「中期目標」和「最終目標」。任何政策如果沒有講清楚「規模」、「路線」和「時間表」,便是務虛。

(四)設計方案:頭三步定出合格條件,接下來就是設計一個能滿足這三點的「通盤方案」。不能假設所有事情都有答案,如找不到可行方案,就要再檢視上面三點之中有哪些地方可以鬆一鬆,希望擴大尋找方案的空間。

(五)「高效」執行方案:現時的社會環境,政府施政困難重重,有幾好的政策,行唔到都係無用。如果政府想爭取公眾的信任,讓執行部門有充足的空間辦事,提升效率,有幾方面要「明知不可為而為之」,希望能 reboot 整個社會系統。

之後四週,我會以這框架分析,尋找對策。但先此聲明,我對這題目的認識只屬「路人甲」水平,寫文嘅目的係「拋磚引玉」,希望有人願意利用這框架畀專業意見,或提出一個更方便討論的框架。唔好急,最緊要快!

住房問題人人有責,請開心 share 畀 friend,同埋留言 share 你嘅想法。

 

原刊於貼地風管 Facebook 專頁

發表意見