立場新聞 Stand News

金像獎終身成就獎得主 楚原發言全文 + 片段

2018/4/16 — 0:49

圖片來源:ViuTV 直播截圖

圖片來源:ViuTV 直播截圖

(編按:導演楚原在今晚香港電影金像獎頒獎禮領取「終身成就獎」,並發表感言。以下發言全文由記者記錄整理而成,發言片段見文末。)

將呢個終身成說獎頒畀一個終身冇乜成就的楚原,即係迫我講一句,受之有愧啫。回首半生青衫人老,在漫長人生中,有開心時候,困難日子都唔少,人生大概都是係失意倍多如意少。

我破咗香港賣座紀錄,老闆即刻同我簽新合同,人工加十倍,個個都話我係香港最幸福嘅導演。

廣告

十幾年後我的戲不賣錢喇,拍完幾部仆街片,到想拍《天龍八部》,開鏡前一日,方逸華小姐出來撕咗張通告,話唔畀拍,入到寫字樓第一句就問我,邊個比你拍《天龍八部》?蝕咗本你有得賠咩?最後兩句仲話,楚原,你根本唔懂電影藝術,唔識拍電影。嗰陣人人都話我係邵氏公司最難堪嘅導演。

但係人生呢兩個字,就係歡聲、淚影四個字砌成,冇乜奇怪,任何人無論昨日幾風光、幾失意,聽日天光一樣要起身做返一個人,繼續生活下去,明天總比昨天好,呢個就係人生!

廣告

唔講你唔知,人生原來同打麻雀一樣,有東南西北風,你打到北風時又是另一個人生,如果你好似我咁,老到無得撈喇,後生要剩返個錢呀,老到好似我咁,連終身成就獎呢個老人牌都拎埋,咁你就應該,應該咩呀…

應該:管它天下千萬事,閒來輕笑兩三聲!到老的時候,無論外面發生咩事,管它喜怒哀樂,管它恩怨情仇,全部都當佢係菩提、明鏡,笑下就算喇。古今多少事,都付笑談中。最後我送比大家,我喜歡的幾句說話:

當你回首往事時,不因碌碌無能而悔恨,不為虛度年華而羞恥,咁你就可以好驕傲同自己講:你無負此生!

多謝!

楚原在妻子南紅和孫女陪同下出席領獎 (viu電視片段截圖)

楚原在妻子南紅和孫女陪同下出席領獎 (viu電視片段截圖)

備用連結:

發表意見