立場新聞 Stand News

如果張國榮、張學友、陳奕迅參加《全民造星》

2018/9/5 — 20:11

最近幾喜歡睇 ViuTV 的《全民造星》,最初十幾集,看那 99 個參賽者逐一表演,和很多人一樣,都覺得騎騎呢呢,和「星」字有十萬里距離。又如歌手小肥曾經所以為,「咪又係一堆想發明星夢嘅𡃁仔圍威喂嘅比賽節目!」

不過睇多幾集,開始改觀。吸引我的,是抵死幽默的旁白(他叫文卓森),是善良可愛但不失威嚴的監製花姐,更因為這個不單是選秀節目,也是真人騷。真人騷的特點是,就算主角們有幾廢柴有幾核突,只要日子久了,觀眾從鏡頭看著一班素人慢慢成長,總有幾分感情。以《全民造星》為例,幾十個參賽男子,高矮肥瘦,琴棋書畫,乜人都有,心總有一個啱你心水。

例如姜濤,19 歲小鮮肉,曾經是 200 磅肥仔,現在是個美少年。過去一個月,ViuTV 專頁經常有班自稱「姜粉」的少女中女老女,為他吶喊助威。

廣告

又例如肥仔梁業,僅 160 cm 高,而且身形肥胖,成個安西教練咁樣,但卻有一番非凡舞藝,無論頭倒立抑或海豚彈地,都睇到觀眾目瞪口呆。

廣告

還有唱歌了得又幾可愛的 Ian、跳舞好厲害又好多女 fans 的 Anson Lo、每次演出都貫徹《100 毛》娛樂精神的龍志權、經常煩膠地喊(但又幾真誠的)Alton、才華洋溢又好跳得的 Dee gor、《狂舞派》主角且有領袖風範的 Lokman……好多好多。這些人,連同不時被網民狠批的保琦(笑似八兩金)、Moley(非常直率),個個都是有血有肉的真人。電視台紀錄了他們追夢的過程、血汗,作為觀眾,我覺得幾好睇呀。

雖則有時又會諗,唉,造乜嘢星吖。《全民造星》正式播出前,ViuTV 先出了一個前傳,大概講述搞比賽的原因。節目先用街訪帶出「香港無乜男明星、偶像」的現象(話時話,其實女星更少呢,thanks to 中港合拍片),然後營造一種「我們要造偶像巨星」的氣氛。

問題來了,如何「造星」?「前傳」提到,ViuTV 將於多間本地娛樂公司合作,當中包括:星娛樂 (環宇) 有限公司、環球唱片 (香港) 有限公司、天下一集團有限公司、寰亞音樂、太陽娛樂文化有限公司、HMV數碼中國集團、大國文化,務求用選秀比賽去揀選、訓練、製造出一顆新星。

這樣造到星嗎?環顧香港流行文化的歷史,今日大家熟悉的偶像巨星,大多透過兩種途徑入行,一是參加藝員訓練班(如周潤發、周星馳、劉德華),二是參加新秀歌唱比賽(張國榮、張學友、陳奕迅),換言之,都是某種形式的選秀。

***

不過我又在想,如果上述巨星出道時參加的是《全民造星》,他們會成功被「造」嗎?

譬如說,如果 1977年的張國榮參加《全民造星》,他的《American Pie》演唱恐怕會被批評只懂在台上行來行去,「唔夠嘢睇」,「無乜娛樂性」。他的即興掟帽表演會繼當年被觀眾「掟返上台」的挫折後,再被HMV公司評判、導演吳漢邦批評「掟嘢的目的係乜?」

如果 1980 年的劉德華參加《全民造星》,他表演乜都好,一定會被蕭定一挑戰:「你覺唔覺得你個名叫 Andy,太普通?」

如果 1984 年的張學友參加《全民造星》,他唱《大地恩情》時的趣怪表情會被網民取笑,再加上他不懂跳舞,恐怕一兩輪比賽後就會被淘汰。

如果 1995 年的陳奕迅參加《全民造星》,他的《望月》唱腔太有張學友味道了,會被狠批沒個人特色,一沉百踩。

更有趣的是,《全民造星》首兩輪比賽都是個人表演,之後就變成五人一組創作、演出,如果周星馳參與比賽,恐怕會跟其他參賽者夾不來;要周潤發、張國榮、劉德華等,一齊擺低自己的獨特稜角,配合其他人唱歌跳舞,他們大概做到,但就失去自己本來的光彩。

我睇《全民造星》正有呢種感想。由四十強開始,節目參賽者分成兩隊,再分組表演。B 組的參賽者大多才華較佳,又比較「性格巨星」(卓韻芝說的),A 組的則多是才華稍遜,但團隊配合較佳。結果兩隊比併,團隊贏了個人,各自較有才華的一隊敗下陣,最後大部分隊員被淘汰。比較偏愛 B 組「性格巨星」們的網民於是鬧爆。

我甚至想,如果目標是「造」一顆星,真的需要他又唱得又跳得而且還要擅長團隊合作嗎?如果有人只獨孤一味(如張學友),又或者因才華太出眾而不擅與人合作(這樣的明星比比皆是,如周星馳),就必然在這制度裡被淹沒,然後被較懂 team-work 但相對沒那麼出眾的對手取代 — 但沒有稜角的,又算得上是「星」嗎?

***

我諗我太認真了。研究流行文化的人都說,明星不是一個與生俱來的概念,而是由媒體、社會集體建構。每個時代都有不同的明星;甚至乎,有些時代背景,根本難以再生產明星。

今時今日就係咁。拿,想像一下,《全民造星》參賽者假如勝出比賽,他會成為怎樣的「明星」?出唱片?(好像愈來愈少公司願意投資唱片了)跳舞表演?(如何演出?)演電影(如蕭定一投資的什麼《西謊極落》)?電視劇?(劇本 OK 嗎?)今日香港的娛樂工業容得下一顆「明星」嗎?香港人又是否願意消費,養活自家生產的「明星」(在指責對方北上大陸搵人仔前)?

星,似乎怎樣也「造」不來。上述與 ViuTV 合作的娛樂公司,近幾年也不知試過幾多次,都造不了。如果娛樂工業的結構沒有改變,投資者的思維原封不動,再出色的「新人」、「新星」,都會落得一模一樣、面目模樣的下場。

當大家對節目無肉緊時,我反而有點「佛系」:咁嘅年代,誰勝誰負還重要嗎?贏出比賽,即使加入了主流娛樂圈,也不代表成為「明星」(或成為傀儡「明星」);輸掉比賽的,失望一時,但也可以繼續自築舞台,吸引知音。追夢的路一直都在。

既然係咁,先繼續欣賞一班大男孩的血汗淚水、真情演出,之後的事之後再算吧。學阿 Dee 話齋,「做乜都死,唔通就乜都唔做咩!」

發表意見