立場新聞 Stand News

澳門議會發言用普通話  間選勞工界李振宇:多年夢想!

2017/10/23 — 21:12

新一屆澳門立法會間選(勞工界)議員李振宇(論盡媒體圖片)

新一屆澳門立法會間選(勞工界)議員李振宇(論盡媒體圖片)

【文:論盡採訪組】

新一屆澳門立法會今日開大會,新任間選(勞工界)議員李振宇已「一鳴驚人」,用一口字正腔圓的普通話宣讀自己第一份議程前發言。被問到何以用「煲冬瓜」發言,李振宇表示,只因自己一個夢!

李振宇以「強化官員責任擔當意識,提高政府執行力和公信力」為議程前發言的題目,指政府行政不作為和行政效率低一直為人詬病,長此下去勢必引發政府治理危機,如何提高治理能力減少居民不滿成為政府極待解決的重大問題。

廣告

唔係曲線,李議員一口字正腔圓的普通話令不少在場記者「O曬嘴」。會後,記者追問李振宇何以用普通話發言,只見李議員用同樣完美的廣東話反問:「而家用普通話回答?」

明明識講廣東話,都要「煲冬瓜」,原來李議員一直都「我有一個夢」,就係坐在議事堂用普通話發言,個夢仲係十幾年前已經開始,話說當時議會發言既有粵語,亦有葡語,唯獨沒有普通話。「我都做過議員助理,當時跟議員嚟開會嘅時候,都有個夢想:如果將來成為議員,係咪都可以嘗試下用普通話發言呢?所以今日第一次議程前發言,可以用普通話,其實都係圓咗我一個夢想。」又解釋,用普通話發言並沒抵觸立法會議事規則,有市民亦提議他用普通話作議程前發言。

廣告

他又表示,這也是一種以身作則,因為特區政府及社會各界都推廣普通話,大灣區建設亦涉及六千多萬人,多數都用普通話交流。「我哋要融入大灣區嘅建設,議員嘅普通話能力必不可少。」再者,作為宜遊城市,澳門每年有三千萬人次的遊客,當中多來自內地,普通話交流亦是常態。「隨住國家的國際地位提高,普通話嘅國際地位提升咗,我哋作為澳門居民,或者國人,都應該學好、講好普通話。」

但怕唔怕居民聽唔明?李振宇表示,有做過有關普通話的調查,大多數居民都識講啲及識聽普通話,「對佢哋難度可能都唔係好大。或者我講得慢少少,多數都會聽得懂。」

咁以後立法會啲發言,包括委員會討論、法案討論,係咪都會用普通話?「民生民政問題我自己會傾向於都係用返廣東話,因為都要關顧返、照顧返大多數居民嘅語言習慣。」又表示自己接下來會以粵語發言為多,普通話則會因為情況決定。「今日第一次議程前發言對於我嚟講係幾重要,包括議題選定,官員問責,市民都比較關注。」又指會期的首次及最後一次發言都想用普通話,再視乎還有哪些情況會用到普通話。

係咪針對特別議題,講俾北方少少嘅人聽,就會用普通話?「其實都唔係嘅,冇呢個特殊嘅諗法。」

李議員咁講,唔知作為特區之首嘅行政長官,宣讀施政報告時又會唔會考慮吓都用「煲冬瓜」,同李議員一齊辯論吓呢?

 

原刊於論盡媒體

發表意見